ევროპაში გაზის მარაგები შესაძლოა კრიტიკულ დონემდე შემცირდეს - Equinor

ნორვეგიული ენერგოკომპანია Equinor-ის ხელმძღვანელების განცხადებით, თუ ჰორმუზის სრუტეში ნაოსნობის შეფერხება კიდევ ერთიდან სამ თვემდე გაგრძელდება, ევროპა გაზის მარაგების კრიტიკული დეფიციტის წინაშე აღმოჩნდება.

ანალიტიკოსების განმარტებით, ბუნებრივი აირის დაბალი რეზერვები და არასტაბილური ფასები საცავების შევსების პროცესს საგრძნობლად აფერხებს. კერძოდ, ამჟამად ევროპული საცავები 35%-ზე ოდნავ მეტადაა შევსებული, რაც სეზონურ ნორმაზე, კერძოდ კი 50%-ზე ბევრად ნაკლებია. ევროკავშირის მიერ დადგენილი რეგულაციით კი, წევრმა ქვეყნებმა ზაფხულის პერიოდში რეზერვები იმგვარად უნდა დააგროვონ, რომ ოქტომბრიდან დეკემბრის დასაწყისამდე საცავების 90%-იანი ნიშნული უზრუნველყონ.

Equinor-ის ხელმძღვანელის განმარტებით, ომის დასრულებისა და სრუტის სწრაფი გახსნის შემთხვევაში, ევროპა მარაგების მისაღებ, თუმცა 75%-იან დონეს მიაღწევს, ბლოკადის გაგრძელება კი ვითარებას მკვეთრად გააუარესებს.