ევროპის 3 ქვეყანაში სუპერმარკეტების სამაცივრე სისტემებზე მორიგი კიბერთავდასხმა განხორციელდა

შვედეთში, ბელგიასა და ლუქსემბურგში მოქმედმა სუპერმარკეტების ქსელებმა მაღაზიების სამაცივრე დანადგარებში ტემპერატურის მოულოდნელი მატება დააფიქსირეს.

კომპანიების განცხადებით, ათეულობით სავაჭრო ობიექტზე დაფიქსირებული შეფერხება, სავარაუდოდ, მორიგ მასშტაბურ კიბერთავდასხმას უკავშირდება.

სისტემური შეფერხება შვედურ ქსელებს, Coop-სა და ICA-ს შეეხო, ბელგიასა და ლუქსემბურგში კი ნიდერლანდური Ahold Delhaize-ის მაღაზიები დააზარალა.

Ahold Delhaize-ის წარმომადგენელმა, სარა დე მეისტერმა დაადასტურა, რომ გაგრილების სისტემებში ტემპერატურა გაიზარდა. ინციდენტის მოკვლევა კი უკვე მიმდინარეობს.

Le Soir-ის ინფორმაციით, შეფერხებამ ბელგიაში ათეულობით სავაჭრო სივრცე, მათ შორის Spar-ის ხუთი ობიექტი და Proxy Delhaize-ის მაღაზიები დააზარალა. პარალელურად, შვედეთში Coop-ის ექვსი სუპერმარკეტი გაითიშა, კომპანია ICA-მ კი დაადასტურა, რომ სამაცივრე დანადგარების ანალოგიური დაზიანება მათ რამდენიმე ფილიალშიც დაფიქსირდა.

სამაცივრე სისტემების მომსახურე კომპანია Sabcobel-ის ხელმძღვანელის, სტეფან მულანსის განმარტებით, ტექნიკოსებმა დაზიანებული დანადგარები ცენტრალური ქსელიდან ეტაპობრივად გათიშეს.

შეგახსენებთ, გასულ თვეში ანალოგიური მასშტაბური კიბერთავდასხმა საფრანგეთის სავაჭრო ქსელებზე განხორციელდა. მაშინ თავდამსხმელებმა 700-მდე მაღაზიის სამაცივრე სისტემაზე დაამყარეს დისტანციური კონტროლი, რამაც სავაჭრო ქსელებს მილიონობით ევროს პროდუქცია გაუნადგურა.