ევროპის ცენტრალური ბანკი ივნისში საპროცენტო განაკვეთს გაზრდის - Reuters

Reuters-ის თანახმად, ევროპის ცენტრალური ბანკი ივნისში საპროცენტო განაკვეთის 25 საბაზისო პუნქტით, 2.25%-მდე გაზრდას გეგმავს. როგორც გამოცემის მიერ გამოკითხული ეკონომისტები ვარაუდობენ, აღნიშნული გადაწყვეტილების მთავარ მიზეზად ახლო აღმოსავლეთში მიმდინარე ომის ფონზე გაზრდილი ინფლაციური წნეხი დასახელდება.

ექსპერტთა ვარაუდით, მარეგულირებელი ამ ნაბიჯით შეეცდებიან, შეამცირონ ის გავლენა, რაც ენერგორესურსების ფასების შოკს ძირითად ინფლაციაზე შეიძლება ჰქონდეს. საყურადღებოა, რომ ანალიტიკოსების უმრავლესობა წლის ბოლომდე მონეტარული პოლიტიკის მინიმუმ კიდევ ერთხელ გამკაცრებასაც პროგნოზირებს.

Morgan Stanley-ის ეკონომისტის, იენს ეიზენშმიდტის განცხადებით, ინფლაციური მოლოდინების სტაბილურობის შესანარჩუნებლად განაკვეთის მინიმუმ ორჯერ გაზრდა გარდაუვალია.

შეგახსენებთ, სამომხმარებლო ფასების ინდექსმა ECB-ის 2%-იან სამიზნე მაჩვენებელს უკვე გადააჭარბა. ახლო აღმოსავლეთში მიმდინარე ომის მესამე თვეს ნავთობის ფასმა ბარელზე $100-ს გადააჭარბა, რამაც კიდევ უფრო შეაფერხა ინფლაციის შემცირება.

გამოკითხული ექსპერტების აზრით, მიმდინარე წლის ბოლომდე ინფლაციის საშუალო მაჩვენებელი 3.2%-ს მიაღწევს.