ფარმაცევტული კომპანია Merck-ის კვარტალურმა შემოსავალმა 16.29 მილიარდ დოლარს მიაღწია

ამერიკულმა ფარმაცევტულმა გიგანტმა Merck-მა პირველი კვარტალის ფინანსური მაჩვენებლები წარადგინა, რომლებმაც ანალიტიკოსების პროგნოზებს გადააჭარბა. როგორც ირკვევა, კომპანიის შემოსავალმა ბოლო 3 თვეში 16.29 მილიარდი დოლარი შეადგინა.

კომპანიის ფარმაცევტული მიმართულების შემოსავალი 5%-ით გაიზარდა და 14.35 მილიარდ დოლარს მიაღწია. ძირითადი ზრდა ონკოლოგიურმა პრეპარატმა, "კეიტრუდამ" უზრუნველყო, რომლის გაყიდვებმაც 8.03 მილიარდი დოლარი შეადგინა. საყურადღებოა, რომ პრეპარატის გასულ წელს დამტკიცებულ ინექციის გზით მისაღებ ვერსიაზე, 128 მილიონი დოლარის მოთხოვნა დაფიქსირდა. ამასთან, მნიშვნელოვანი შედეგი აჩვენა ფილტვის იშვიათი დაავადების სამკურნალო მედიკამენტმა, "ვინრევეარმა", რომლის რეალიზაციაც 88%-ით გაიზარდა. არსებული ინფორმაციით, ცხოველთა ჯანმრთელობის დაცვის დეპარტამენტის შემოსავალმა 1.79 მილიარდი დოლარი შეადგინა.

პოზიტიური დინამიკის მიუხედავად, კორპორაციას სირთულეები შეექმნა "გარდასილის" ვაქცინის რეალიზაციის კუთხით. ვაქცინის გაყიდვები 19%-ით შემცირდა და 1.07 მილიარდი დოლარი შეადგინა, რაც ჩინეთში მიწოდების შეწყვეტამ და აშშ-ში შესყიდვების კლებამ გამოიწვია.

აქვე უნდა ითქვას ისიც, რომ თუ გასული წლის ანალოგიურ პერიოდში კორპორაციამ 5.08 მილიარდი დოლარის წმინდა მოგება მიიღო, ამჯერად კვარტალი 4.24 მილიარდი დოლარის ზარალით ჩაიხურა. თუმცა, როგორც ირკვევა, ეს უარყოფითი შედეგი Cidara Therapeutics-ის შეძენასთან დაკავშირებულმა ერთჯერადმა ხარჯებმა განაპირობა. კორექტირებულმა ზარალმა თითო აქციაზე 1.28 დოლარი შეადგინა, უოლ სტრიტის ანალიტიკოსების მიერ ნავარაუდევ 1.51 დოლარზე ნაკლებია.

შექმნილი ვითარების გათვალისწინებით, Merck-მა 2026 წლის სრული ფისკალური წლის საპროგნოზო მაჩვენებლები დააზუსტა. კომპანია მოელის, რომ წლიური შემოსავალი 65.8-67 მილიარდი დოლარის ფარგლებში იქნება.