„ფასდაკლებებს უფრო სისტემური სახით მივუდგებით“ - რას გულისხმობს რითეილ ასოციაციის „საოჯახო კალათა?“
„ბიზნესი სთავაზობს საზოგადოებას იმას, რასაც აქამდეც ვაკეთებდით, უბრალოდ ამას უფრო სისტემური ხასიათი მიეცემა“ - ეს განცხადება „საქმიანი დილის“ ეთერში რითეილ ასოციაციის გამგეობის თავმჯდომარემ და „გუდვილის“ დირექტორმა გიორგი ხაბაშვილმა გააკეთა.
მისი თქმით, საცალო ვაჭრობის სექტორი ფასების პოლიტიკაში ე.წ. High-Low მოდელს უფრო სისტემურ სახეს მისცემენ, რაც პირველადი პროდუქტების კატეგორიაში მუდმივ ფასდაკლებებს მოიაზრებს.
„აღნიშნული კვლევის მიხედვით, საქართველოში ფასების პოლიტიკაზე მოქმედებს ე.წ. „მაღალი-დაბალი“ ფასების პრინციპი. წარმოდგენილია მისი სტრუქტურაც: რეგულარულ ფასზე ქსელების გაყიდვების დაახლოებით 20% მოდის, საშუალო მასშტაბის ფასდაკლებებზე დაახლოებით 30%, ხოლო ე.წ. ღრმა ფასდაკლებულ პროდუქტებზე 50%.
ჩვენი განცხადების ფარგლებში, რითეილ ასოციაციის სახელით, გავაჟღერეთ ის ინფორმაცია, რომელსაც ჩვენი წევრებისგან ვფლობთ: ასოციაციის წევრი კომპანიები გეგმავენ ამ პროცესისთვის უფრო სისტემური ხასიათის მიცემას. კერძოდ, საუბარია „საოჯახო“ ან „სენსიტიური“ პროდუქტების კალათაზე.
მაგალითად, ავიღოთ მაკარონის კატეგორია: თუ კონკრეტულ ქსელს აქვს, ვთქვათ, 10 დასახელების მაკარონი, მიზანია, რომ მინიმუმ ერთ პროდუქტზე მუდმივად არსებობდეს ღრმა ფასდაკლება ან სპეციალური შეთავაზება. ეს განსაკუთრებით მნიშვნელოვანია იმ მომხმარებლებისთვის, ვისთვისაც ფასი გადამწყვეტი ფაქტორია. კვლევები აჩვენებს, რომ ასეთი მომხმარებლები მოსახლეობის მნიშვნელოვან ნაწილს დაახლოებით 60%-ზე მეტს შეადგენენ.
ბიზნესი, ფაქტობრივად, საზოგადოებას სთავაზობს იმას, რასაც აქამდეც აკეთებდა, თუმცა ახლა ეს უფრო სისტემურად განხორციელდება. მაგალითად, შესაძლოა ადრე ყოფილიყო პერიოდი, როცა რომელიმე ქსელს გარკვეული კატეგორიის, ვთქვათ, ბრინჯის, არც ერთ პროდუქტზე არ ჰქონდა აქცია. ახალი მიდგომის ფარგლებში, ასეთი შემთხვევები მინიმუმამდე შემცირდება“, - განაცხადა ხაბაშვილმა.