ფაშინიანის თქმით, სომხეთი ევროკავშირში გაწევრიანების განაცხადს 2027 ან 2028 წელს შეიტანს

სომხეთმა ევროკავშირში გაწევრიანებაზე ოფიციალური განაცხადის შეტანის შესაძლო ვადად 2027 ან 2028 წელი დაასახელა.

Euronews-ის გაფართოების სამიტზე გამოსვლისას პრემიერ-მინისტრმა ნიკოლ ფაშინიანმა განაცხადა, რომ ერევანმა წევრობის შესახებ საბოლოო გადაწყვეტილების მისაღებად შესაბამისი პროცესი უკვე დაიწყო. მთავრობის მეთაურის შეფასებით, „მომავალ წელს ეს მიზანი შესაძლოა რეალისტური იყოს და რეალისტური შეიძლება 2028 წელიც იყოს“.

ფაშინიანის განმარტებით, ევროკავშირში ინტეგრაცია 2018 წლის რევოლუციის შემდეგ სომხეთის დემოკრატიის დასაცავად მიღებულ სტრატეგიულ არჩევნად მიიჩნევა.

"ჩვენი ხალხისთვის დემოკრატია ვითარებათა დამთხვევა არ არის, ეს სტრატეგიული არჩევანია, დემოკრატიული რეფორმების განხორციელების პროცესში კი სომხეთის ერთ-ერთი მთავარი პარტნიორი სწორედ ევროკავშირი იყო“ - თქვა ფაშინიანმა.

სომხეთის ლიდერის განცხადებით, მთავრობის უმთავრესი მიზანი საზოგადოებისთვის ალტერნატივის შექმნაა, რადგან ქვეყანაში და მის სამეზობლოში ტრადიციულად არსებობდა შეხედულება, რომ ერევანს სხვა არჩევანი არ გააჩნდა.

საყურადღებოა, რომ მოსკოვის მხრიდან გაჟღერებული მუქარის, მათ შორის ენერგორესურსების შესაძლო შეწყვეტის ფონზე, სომხეთის მთავრობა პოლიტიკური და ეკონომიკური კავშირების დივერსიფიკაციას გეგმავს.

თავის მხრივ, ფაშინიანი რუსეთის უშიშროების საბჭოს თავმჯდომარის მოადგილის, დიმიტრი მედვედევის იმ განცხადებასაც გამოეხმაურა, რომლის თანახმადაც სომხეთი შესაძლოა „შემდეგ უკრაინად“ იქცეს. ამ სიტყვებს ლიდერმა უსაფუძვლო უწოდა და აღნიშნა, რომ დამოუკიდებლობის დაცვა მისი ადმინისტრაციისთვის პრიორიტეტად ყოველატვის დარჩება.

„ჩვენი მიზანი დამოუკიდებლობის განმტკიცება და განვითარებაა, ქვეყნის მისწრაფებას კი, იყოს უფრო დამოუკიდებელი და ინტეგრირებული, ვერავინ შეამცირებს“. - განაცხადა სომხეთის ლიდერმა.

ამასთან, ფაშინიანმა აღნიშნა, რომ ევროკავშირში ინტეგრაციასა და რუსეთის ევრაზიულ ეკონომიკურ კავშირში დარჩენას შორის არსებული კომპრომისის შესახებ ინფორმირებულია. მისი თქმით, საბოლოო არჩევანი სომეხმა ხალხმა უნდა გააკეთოს. ამ კონტექსტში მან რეგიონულ მაგალითზეც გაამახვილა ყურადღება:

„ჩვენ შთაგვაგონა საქართველოს მტკიცე გადაწყვეტილებამ, გახდეს ევროკავშირის სრულუფლებიანი წევრი. სომხეთისთვის საქართველოს წარმატება ძალიან მნიშვნელოვანია, რათა ჩვენმა მოქალაქეებმა საკუთარი ევროპული პერსპექტივა მკაფიოდ აღიქვან“. - თქვა ფაშინიანმა.

ცნობისთვის, ერევანი ამ ეტაპზე ევროკომისიასთან სავიზო რეჟიმის ლიბერალიზაციის თაობაზე მოლაპარაკებებს აწარმოებს და პროცესის დასრულებას 2029 წლისთვის გეგმავს.