ფინეთი ევროპაში პირველი ქვეყანა გახდა, რომელიც ლითიუმის სრულ საწარმოო ციკლს მართავს

ფინეთის გეოლოგიური სამსახურის ინფორმაციით, ფინეთი გახდა ევროპაში პირველი ქვეყანა, სადაც ლითიუმის წარმოების სრული ციკლი - მაღაროდან დაწყებული გადამმუშავებელი ქარხნით დამთავრებული განთავსდა.

ქალაქ კაუსტინენში მდებარე "სივაიარვის" ღია კარიერი ბატარეის (აკუმულატორის) ხარისხის ლითიუმის ჰიდროქსიდს აწარმოებს - კრიტიკულ მასალას თანამედროვე ელექტრონიკისთვის, ელექტრომობილებიდან დაწყებული სმარტფონებით დამთავრებული.

ლითიუმზე მოთხოვნას ხშირად მე-20 საუკუნის დასაწყისში ნავთობზე არსებულ მოთხოვნას ადარებენ - ფინეთი კი ევროპაში ლითიუმის ერთ-ერთ ყველაზე დიდ მარაგს ფლობს.

783 მილიონი ევროს ღირებულების პროექტს ფინური სამთო და ბატარეების მასალების კომპანია Keliber Oy მართავს.

მისი აქციების 80%-ს სამხრეთაფრიკული სამთო გიგანტი Sibanye-Stillwater-ი ფლობს, ხოლო დარჩენილი 20% ფინეთის სახელმწიფო კომპანია Finnish Minerals Group-ს ეკუთვნის. ევროპის საინვესტიციო ბანკმა (EIB) პროექტისთვის დამატებით 150 მილიონი ევროს დაფინანსება გამოყო.

კომპანია Keliber-ის აღმასრულებელმა დირექტორმა ჰანუ ჰაუტალამ განაცხადა, რომ პროექტი აზიიდან და ავსტრალიიდან ლითიუმის იმპორტზე ევროპის დამოკიდებულებას შეამცირებს.

მაღარო სრული დატვირთვით მუშაობას, სავარაუდოდ, ორ წელიწადში დაიწყებს. სატვირთო მანქანები მადანს ახლომდებარე გამამდიდრებელ ქარხანაში გადაიტანენ, სადაც ქვიშის მსგავსი კონცენტრატი დამზადდება. შემდეგ ის გადამმუშავებელ ქარხანაში გადავა, რათა ბატარეის ხარისხის ლითიუმის ჰიდროქსიდი მიიღონ.

Keliber-ის პროექტი 500 კვადრატულ კილომეტრზე მეტ ტერიტორიას მოიცავს და სივაიარვის გარდა, რეგიონში კიდევ ექვსი დამატებითი მაღაროს გახსნას გეგმავს.