ფიქსირებული ინტერნეტის აბონენტების რაოდენობა 1.1 მილიონამდე, შემოსავლები კი ₾40.5 მლნ-მდე გაიზარდა

კომუნიკაციების კომისიის მაისის ანგარიშის მიხედვით, საქართველოში ფიქსირებული ინტერნეტ მომსახურების ბაზარი ზრდას განაგრძობს.

კერძოდ, კომისიის მიერ გამოქვეყნებული ინფორმაციის მიხედვით, ინტერნეტის მომხმარებელთა საერთო რაოდენობამ 1182 ათასი შეადგინა, რაც 2025 წლის მაისთან შედარებით 2.3%-იან ზრდას აჩვენებს.

ასევე გაიზარდა ფიქსირებული ინტერნეტიდან მიღებული შემოსავლებიც. მაისში შემოსავლები 40.5 მლნ ლარამდე გაიზარდა. ეს მაჩვენებელი 8%-ით აღემატება წინა წლის ანალოგიურ მონაცემს, რომელიც 37.4 მლნ ლარს შეადგენდა.

ფიქსირებული ინტერნეტის აბონენტთა აბსოლუტურ უმრავლესობას (95%) ფიზიკური პირები შეადგენენ (1 მლნ 124 ათასი აბონენტი), ხოლო იურიდიული პირების წილი 5%-ია (58 ათასი). თუმცა შემოსავლების გადანაწილება განსხვავებულია:

• ფიზიკური პირებისგან მიღებულმა შემოსავალმა 29.47 მლნ ლარი შეადგინა (ბაზრის 72%); • იურიდიული პირებისგან მიღებულმა შემოსავალმა კი 11 მლნ ლარი შეადგინა (ბაზრის 28%);

საშუალოდ ერთი აბონენტისგან მიღებული შემოსავალი (ARPU) ფიზიკურ პირებში 26.2 ლარია, ხოლო იურიდიულ პირებში ეს მაჩვენებელი ბევრად მაღალია და 191.4 ლარს აღწევს. კომისიის განმარტებით, ფიზიკური პირებისთვის ARPU-ს შედარებით დაბალ ნიშნულს პროვაიდერების მხრიდან აქტიური ფასდაკლებები და კომბინირებული (პაკეტური) შეთავაზებები განაპირობებს.

მომსახურების ბაზარზე ლიდერ პოზიციებს კვლავ ორი მსხვილი ოპერატორი ინარჩუნებს. აბონენტების რაოდენობისა და შემოსავლების მიხედვით კომპანიების წილები ასე გადანაწილდა:

• მაგთიკომი - ბაზრის ლიდერია აბონენტების 44.9%-ით და შემოსავლების 44%-იანი წილით; • სილქნეტი - ფლობს აბონენტების 32.9%-სა და ბაზრის შემოსავლების 33.7%-ს; • სქაიტელი - სტაბილურად იზრდება, მისი წილი აბონენტებში 6.7%-ია, ხოლო შემოსავლებში - 6.5%; • ახალი ქსელების ჯგუფი - აბონენტების 5.5%-ს და შემოსავლების 3.4%-ს აკონტროლებს;