ფოთის პორტში საკონტეინერო ტვირთბრუნვა კვლავ რეკორდულ ნიშნულზეა - APM TERMINALS POTI

2026 წლის პირველ ოთხ თვეში „ეიპიემ ტერმინალს ფოთში“ საკონტეინერო ტვირთბრუნვამ კვლავ ზრდა აჩვენა და ბოლო წლების ყველაზე მაღალი მაჩვენებელი დაფიქსირდა. პორტის ადმინისტრაციის მონაცემების მიხედვით, 2026 წლის იანვარ-აპრილის პერიოდში ჯამურად დამუშავდა 212 129 ტეუ, რაც აღემატება როგორც 2025 წლის ანალოგიურ მაჩვენებელს (197 315 ტეუ), ისე 2024 წლის შედეგს (172 501 ტეუ).

"თვიური დინამიკა ზრდის ტენდენციას ნათლად აჩვენებს: იანვარში დამუშავდა 54 523 ტეუ, თებერვალში - 45 982 ტეუ, მარტში - 52 959 ტეუ, ხოლო ყველაზე მაღალი მაჩვენებელი აპრილში დაფიქსირდა - 58 665 ტეუ".

გაზრდილია საკონტეინერო გემების მიღების რაოდენობაც. 2026 წლის დასაწყისიდან დღემდე ნავსადგურმა 131 საკონტეინერო გემი მიიღო, მაშინ როცა 2025 წლის იგივე პერიოდში ეს მაჩვენებელი 107-ს, ხოლო 2024 წელს 101-ს შეადგენდა.

პორტის ადმინისტრაციის ცნობით, პოზიტიური დინამიკა შეინიშნება გენერალური ტვირთების მიმართულებითაც. 2026 წელს დამუშავდა 125 800 ტონა გენერალური ტვირთი, რაც აღემატება 2025 წლის მაჩვენებელს (118 045 ტონა) და მნიშვნელოვნად აღემატება 2024 წლის მონაცემს (68 001 ტონა).

აღსანიშნავია, რომ 2026 წლის ოთხ თვეში დაფიქსირდა როგორც დამუშავებული კონტეინერების, ისე მიღებული საკონტეინერო გემების რეკორდული მაჩვენებლები, რაც პორტის ადმინისტრაციით თქმით, კიდევ ერთხელ უსვამს ხაზს ფოთის პორტის მზარდ როლს რეგიონულ ლოგისტიკურ ქსელში.