„ფრონტზე სიჩუმე არ ყოფილა“ - პუტინის მოსაზრებას, რომ უკრაინაში ომი დასასრულს უახლოვდება, ზელენსკი არ ეთანხმება

ვოლოდიმირ ზელენსკის განცხადებით, რუსეთს ომის დასრულება განზრახული არ აქვს და კიევი შემდგომი თავდასხმებისთვის ემზადება - ამის შესახებ უკრაინის პრეზიდენტმა 11 მაისს, ფაშიზმზე გამარჯვების დღესთან დაკავშირებული ზავის დასრულების დღეს განაცხადა. აღსანიშნავია, რომ ორივე მხარე ერთმანეთს ცეცხლის შეწყვეტის პირობების დარღვევაში ადანაშაულებდა.

ზელენსკის ეს განცხადება ასევე მოჰყვა რუსეთის პრეზიდენტის, ვლადიმერ პუტინის განცხადებას (რომელიც მან ორი დღით ადრე გააკეთა), სადაც ის კონფლიქტის დასრულებაზე მიანიშნებდა.

"დღეს ფრონტის ხაზზე სიჩუმე არ ყოფილა. საბრძოლო მოქმედებები გრძელდებოდა. რუსეთს არ აქვს ამ ომის დასრულების განზრახვა. და ჩვენ, სამწუხაროდ, ახალი თავდასხმებისთვის ვემზადებით. მაგრამ მშვიდობა უნდა დადგეს. სწორედ ამისთვის ვმუშაობთ ჩვენ", - აღნიშნა ზელენსკიმ თავის ტრადიციულ, ღამის ვიდეომიმართვაში.

ზავის მიუხედავად, ორივე მხარე გრძელ ფრონტის ხაზზე ბრძოლების შესახებ იუწყებოდა და ერთმანეთს დრონებითა და საარტილერიო იერიშებით თავდასხმებში ადანაშაულებდა.

პრეზიდენტ დონალდ ტრამპის ხელმძღვანელობით სამშვიდობო ძალისხმევის ფარგლებში, პარასკევს უკრაინა და რუსეთი 9-დან 11 მაისამდე ცეცხლის შეწყვეტაზე შეთანხმდნენ.

გამარჯვების დღისადმი მიძღვნილი ღონისძიებების შემდეგ, შაბათს, პუტინმა განაცხადა, რომ მისი აზრით, ომი დასასრულს უახლოვდება. მან აღნიშნა, რომ მზად არის ევროპისთვის უსაფრთხოების ახალ ღონისძიებებზე მოლაპარაკებებისთვის, სასურველ პარტნიორად კი გერმანიის ყოფილი კანცლერი, გერჰარდ შრედერი დაასახელა.

თუმცა, ორშაბათს ბრიუსელში შეკრებილმა ევროპელმა საგარეო საქმეთა მინისტრებმა პუტინის ეს წინადადება უარყვეს. მათ გამორიცხეს შრედერის ნებისმიერი როლი ამ პროცესში, რადგან ის რუსულ სახელმწიფო კომპანიებში მუშაობდა და პუტინთან მჭიდრო ურთიერთობები ჰქონდა.

კვირას ზელენსკიმ აღნიშნა, რომ მოსკოვმა თავი შეიკავა მასშტაბური საჰაერო და სარაკეტო თავდასხმებისგან, თუმცა იერიშები გაგრძელდა 1,200 კილომეტრიანი ფრონტის ხაზის იმ ნაწილებში, სადაც რუსული ძალები წინ მიიწევენ. მისი თქმით, უკრაინული ჯარები მტერს პასუხობდნენ და საკუთარ პოზიციებს იცავდნენ.

რუსულმა სახელმწიფო საინფორმაციო სააგენტოებმა ორშაბათს რუსეთის თავდაცვის სამინისტროს განცხადება გაავრცელეს, რომლის თანახმადაც, ზავის დაწყებიდან მათ უკრაინის მხრიდან ცეცხლის შეწყვეტის 23 802 დარღვევა დააფიქსირეს. სამინისტროს ცნობით, რუსულმა ჯარებმა უკრაინულ თავდასხმებს საპასუხო ცეცხლით უპასუხეს.