"ფუდ გალერის" საკვები, რომელშიც სტაფილოკოკი გამოვლინდა - კომპანია დაზარალებულებს ბოდიშს უხდის
"ფუდ გალერის" უზბეკური ფლოვი, ომლეტი სოკოთი, ბოსტნეულის კოქტეილი, ტირამისუ და ქათმის ფილე (ნედლი) არ შეესაბამება დადგენილ მოთხოვნებს - სურსათის ეროვნული სააგენტო ლაბორატორიული მოკვლევის შედეგებს აქვეყნებს.
მათი ინფორმაციით, სურსათის ეროვნულმა სააგენტომ დაბალანსებული კვების მწარმოებელ და მიმწოდებელ კომპანია „ფუდ გალერის“, რომელიც ქუთაისში ოპერირებს საწარმოო პროცესი 22 მაისს შეუჩერა. სურსათის ეროვნულმა სააგენტომ დაავადებათა კონტროლისა და საზოგადოებრივი ჯანმრთელობის ეროვნული ცენტრიდან მიიღო შეტყობინება 36 ადამიანის საკვებისმიერი ინტოქსიკაციის შესახებ. კომპანიაში აცხადებენ, რომ 21 მაისს მათთან მომხმარებლების ინტოქსიკაციის შემთხვევები დაფიქსირდა და კომპანია სურსათის ეროვნულ სააგენტოს დაუკავშირდა, რომელმაც ჩვენი საწარმო შეამოწმა და შესაბამისი რეკომენდაციები გასცა.
სეს-ის მიერ დღეს გავრცელებული ინფორმაციით, სურსათის ეროვნულმა სააგენტომ „ფუდ გალერიდან“ აღებული სურსათის ნიმუშების ლაბორატორიული კვლევის შედეგები მიიღო.
"დადგინდა, რომ უზბეკური ფლოვი, ომლეტი სოკოთი, ბოსტნეულის კოქტეილი, ტირამისუ და ქათმის ფილე (ნედლი) არ შეესაბამება დადგენილ მოთხოვნებს, კერძოდ, აერობული მიკროორგანიზმების გადაჭარბებული ოდენობა აღმოჩნდა უზბეკური ფლოვის, ომლეტის (სოკოთი), ბოსტნეულის კოქტეილისა და ტირამისუს ნიმუშებში;
გარდა ამისა, გამოვლინდა ოქროსფერი სტაფილოკოკი და კოლიფორმული ბაქტერიები.
აღნიშნულიდან გამომდინარე, ბიზნესოპერატორს დაევალა სამუშაო ზედაპირების, მოწყობილობების, აღჭურვილობების რეცხვა-დეზინფექცია და ნიმუშების აღება; პერსონალის ჯანმრთელობის მდგომარეობის კონტროლი და ლაბორატორიული კვლევის ჩატარება", - ნათქვამია სეს-ის განცხადებაში.
„ფუდ გალერიში“ მომხდარ მოვლენებს ეხმიანებიან და მომხმარებელს აღნიშნული ფაქტის გამო ბოდიშს უხდიან.
"ჩატარებული მოკვლევის შედეგად დადგინდა, რომ ჩვენს ერთ-ერთ თანამშრომელს ჰქონდა სტაფილოკოკური ინფექცია, რომელიც ჰაერწვეთოვანი გზით ვრცელდება. სწორედ ამ ფაქტმა გამოიწვია გარკვეული მომხმარებლების ინტოქსიკაცია.