გადასახადის ზრდის გამო, უკრაინული ბანკების მოგება მცირდება

უკრაინულ ბანკებში, მიუხედავად შემოსავლების მნიშვნელოვანი ზრდისა, 2026 წლის დასაწყისში წმინდა მოგების მაჩვენებელი მკვეთრად შემცირდა, რაც სექტორისთვის მოგების გადასახადის 50%-მდე გაზრდით არის განპირობებული.

2026 წლის პირველ ორ თვეში საბანკო სექტორის წმინდა მოგება წლიურ ჭრილში 36.4%-ით შემცირდა და 17.78 მილიარდი გრივნა ($450 მლნ) შეადგინა, რაც ბოლო ათწლეულის განმავლობაში ერთ-ერთი ყველაზე მკვეთრი ვარდნაა.

როგორც ირკვევა, მაჩვენებლების გაუარესების მთავარი ფაქტორი ხარჯების 47.1%-იანი ზრდაა, რომელმაც ისტორიულ მაქსიმუმს, 88 მილიარდ გრივნას მიაღწია, სადაც ძირითადი წილი საგადასახადო ვალდებულებებზე მოდის. საანგარიშო პერიოდში ბანკებმა ბიუჯეტში 17.3 მილიარდი გრივნა გადაიხადეს, რაც გასული წლის ანალოგიურ პერიოდთან შედარებით 161%-ით მეტია. ეს ზრდა 2025 წლის ბოლოს მიღებულ კანონს უკავშირდება, რომელმაც 2026 წლისთვის სექტორის მოგების გადასახადი 25%-იდან 50%-მდე გააორმაგა და კრედიტორებს მიმდინარე დასაბეგრი შემოსავლიდან წარსული ზარალის გაქვითვის შესაძლებლობა შეუზღუდა.

მთავრობის პროგნოზით, მიღებული ცვლილება მიმდინარე წელს ბიუჯეტში დამატებით $520 მილიონის მობილიზებას უზრუნველყოფს, რაც ქვეყნის ბიუჯეტის დაფინანსების კრიტიკულ წყაროს წარმოადგენს.