განათლების სამინისტრო სკოლის ფორმების შემოღებას VII-X კლასებშიც გეგმავს
მივიღეთ გადაწყვეტილება, სკოლის ფორმის კულტურა ჯერ ქვედა კლასებში დავამკვიდროთ და ყოველწლიურად თითო კლასი დავამატოთ, - ამის შესახებ განათლების მინისტრმა გივი მიქანაძემ პარლამენტის პლენარულ სხდომაზე განაცხადა.
მინისტრის თქმით, გადაწყვეტილება მიზნად ისახავს პროცესის ეტაპობრივ და მშვიდ განხორციელებას, რათა სკოლებში არ შეიქმნას დამატებითი დაძაბულობა.
"[საჯარო] სკოლაში ფორმას არ ვაბრუნებთ, სკოლაში ფორმა შემოგვაქვს, იმიტომ რომ საქართველოს დამოუკიდებლობის აღდგენის შემდეგ, სასკოლო ფორმა არ ყოფილა. შესაბამისად, თაობები ისე გაიზარდნენ რომ სკოლის ფორმა კერძო სკოლებში იყო დანერგილი, ისიც ყველგან არა, აპრობირებული არ იყო ჩვენს რეალობაში. სწორედ ამიტომ, მივიღეთ გადაწყვეტილება, სკოლის ფორმის კულტურა ჯერ ქვედა კლასებში დავამკვიდროთ და ყოველწლიურად თითო კლასი დავამატოთ და თუკი მეექვსე კლასელები წელს პირველ სემესტრში ფორმას ჩაიცვამენ შემდეგი წლიდან მეშვიდე, იმის შემდეგი წლიდან კი მერვე კლასი დაემატება და ასე, რამდენიმე წლის განმავლობაში უკვე ეს ფორმის კულტურა ჩამოყალიბდება და არანაირ კონფრონტაციას არ ექნება ადგილი", - თქვა მან.
გივი მიქანაძის თქმით, რეფორმის ეტაპობრივი მიდგომა თავიდან აიცილებს შესაძლო კონფლიქტებს როგორც მოსწავლეებსა და მასწავლებლებს შორის, ისე სკოლის ადმინისტრაციებთან.
BM.GE
წყარო: bm.ge