გავიარეთ კონსულტაცია ბუნებრივი ღვინის ასოციაციასთან - "ვაზისა და ღვინის" კანონში გოგირდის მოცულობა დაზუსტდება

პარლამენტის სოფლის მეურნეობის კომიტეტმა სხდომაზე „ვაზისა და ღვინის შესახებ“ კანონში ცვლილებებს II მოსმენით მხარი დაუჭირა.

კანონპროექტით ორი მექანიზმი - ალკოჰოლური სასმელების სპეციალური ნიშანდება და სავალდებულო დეგუსტაცია შემოდის, რომელიც როგორც საექსპორტო, ასევე ადგილობრივ სამომხმარებლო ბაზარზე სარეალიზაციოდ განკუთვნილი ღვინის ყველა კატეგორიაზე გავრცელდება.

კომიტეტის სხდომაზე ღვინის ეროვნული სააგენტოს ხელმძღვანელმა ლევან მეხუზლამ განაცხადა, რომ ბიზნესის თხოვნით კანონპროექტში შევა ცვლილება, რომ გოგირდის მოცულობა ლიტრზე 50 მილიგრამამდე გაიზარდოს.

„გავიარეთ კონსულტაციები შესაბამის ასოციაციასთან, რომელიც სწორედ ბუნებრივი ღვინის ასოციაციაა და მათი ერთ-ერთი წინადადება იყო, რომ 40-ის მაგივრად 50 მილიგრამი საერთო გოგირდი ჩაიწეროს. მათი ერთ-ერთი არგუმენტი არის ის, რომ ეს ცვლილება გამარტივებისკენ არის მიმართული; ჩვენი შემთხვევა 40 მილიგრამი უფრო მკაცრია, შესაბამისად, 50 მილიგრამამდე გაზრდით, პირიქით, ლიბერალიზაცია, შედარებით მცირედით, მაგრამ მაინც ხდება. იმიტომ რომ ცნობილი გამოფენების ციკლში RAW WINE, რომელიც სწორედ ბუნებრივ ღვინოს მიეძღვნება, დასაშვები ნორმა 50 მილიგრამია ლიტრზე. შესაბამისად, თუ ამის ჩასწორების საშუალება იქნება და გაითვალისწინებთ, ძალიან კარგი იქნება. თუ მოხერხდება, რომ 40 მილიგრამის მაგივრად ჩაიწეროს 50 მილიგრამი ლიტრზე, ესეც კარგი იქნება", - განაცხადა მეხუზლამ.