გერმანული Rheinmetall-ი უკრაინას ათიათასობით საარტილერიო ჭურვს მიაწვდის
უკრაინამ გერმანულ სამხედრო კომპანია Rheinmetall-თან რამდენიმე ათიათასი ერთეული 155 მილიმეტრიანი საარტილერიო ჭურვის მიწოდების შესახებ ხელშეკრულება გააფორმა.
როგორც ირკვევა, გარიგების ღირებულება რამდენიმე ათეულ მილიონ ევროს შეადგენს.
არსებული ინფორმაციით, საბრძოლო მასალის წარმოება უკვე დაწყებულია, ხოლო კონტრაქტით გათვალისწინებული მიწოდება 2027 წლის პირველ კვარტალში უნდა დასრულდეს. აღსანიშნავია, რომ აღნიშნულ ამუნიციას Rheinmetall-ი ესპანეთში მდებარე საწარმოში, Rheinmetall Expal Munitions-ში აწარმოებს.
რაც შეეხება კომპანიის სხვა მიმდინარე პროექტებს, ივნისის დასაწყისში ცნობილი გახდა, რომ ჩრდილოატლანტიკური ალიანსის აღმოსავლეთ ფლანგის გასაძლიერებლად, Rheinmetall-ი რუმინეთს €5.7 მილიარდის ღირებულების სამხედრო ტექნიკას მიაწვდის. ამასთან, კომპანია კამიკაძე დრონების გამოშვებასაც გეგმავს.
BM.GE
წყარო: bm.ge