ღვინის სერტიფიკატის საფასური მცირე მარნებისთვის გამოწვევაა - "ნოდოს მეღვინეობა"

ღვინის სერტიფიკატის გაცემისთვის 10-ლარიანი საფასურის დაწესება მცირე მარნებისთვის დამატებითი ხარჯია, რომელიც განსაკუთრებით მცირე მოცულობის შეკვეთებზე აისახება. ამის შესახებ „ნოდოს მეღვინეობის“ დამფუძნებელმა თათია გოგიბერიძემ BMGTV-ს გადაცემაში „ქალების ნარატივი“ განაცხადა.

მისი თქმით, მცირე მეღვინეობებს, დიდი კომპანიებისგან განსხვავებით, როგორც წესი, დიდი მოცულობის შეკვეთები არ აქვთ. ამიტომ თითოეულ შეკვეთაზე სერტიფიცირების პროცედურის გავლა და შესაბამისი საფასურის გადახდა მათთვის უფრო საგრძნობი ხარჯია.

„მცირე მარნებს, არ გვაქვს ისეთი შეკვეთები, ვთქვათ, 20 ყუთი. ჩვენ გვაქვს შეკვეთები, მაგალითად, ერთი ყუთი, გვქონია შეკვეთა რამდენიმე ბოთლიც ან 4 ყუთი. ნებისმიერ შეკვეთაზე, ერთი ყუთი იქნება წასაღები სადმე თუ სამი ბოთლი, გასაკეთებელი იქნება ხელახლა განაცხადი სერტიფიცირებაზე და გადასახდელი იქნება ეგ თანხაც.

მარტო ჩემი არა, ირგვლივ ჩვენ ვმეგობრობთ მცირე მარნებთან, მეღვინეებთან და ვფიქრობ, მცირე და საშუალო დონის მარნებისთვის კიდევ უფრო გამოწვევაა, ვიდრე დიდი კომპანიებისთვის“, - განაცხადა გოგიბერიძემ.

მისივე შეფასებით, რეგულაციის გავლენა განსაკუთრებით რეგიონებში მოქმედ მცირე მეღვინეობებზე იქნება შესამჩნევი, სადაც ღვინის ბაზარი და ტურისტული ნაკადები ჯერ ისეთი მასშტაბის არ არის, როგორიც მეღვინეობის უფრო განვითარებულ რეგიონებში: „განსაკუთრებით ასეთ რეგიონებში, სადაც ნაკლებია ტურიზმი, უფრო ახლად იწყებს მეღვინეობა ნელ-ნელა აღორძინებას, გამოწვევა ნამდვილად იქნება“, - აღნიშნა მან.

ღვინის ეროვნული სააგენტოს ახალი ტარიფები 1-ელი სექტემბრიდან ამოქმედდა. ადგილობრივ ბაზარზე რეალიზაციისთვის შესაბამისობის სერტიფიკატის საფასური 10 ლარია. ექსპორტისთვის საჭირო სერტიფიკატის ღირებულება კი მომსახურების მიღების ვადის მიხედვით 110-დან 650 ლარამდე მერყეობს, ხოლო მცირე ზომის მარნებისთვის ექსპორტის სერტიფიკატზე ცალკე, შეღავათიანი ტარიფებია განსაზღვრული.