გიორგი უძილაური ბრალს არ აღიარებს, მის საქმეს გრიფი დაედო - ადვოკატი

ბანკ „ქართუს“ საზოგადოებასთან ურთიერთობის სამსახურის ყოფილ უფროსს, გიორგი უძილაურს, რომელსაც პროკურატურა ჯაშუშობას ედავება, ბრალი ოფიციალურად წარედგინა. მისი ინტერესების დამცველის, ბექა გულედანის განცხადებით, დაკავებული ბრალს არ აღიარებს.

ადვოკატის განმარტებით, საქმეს გრიფი ადევს, რის გამოც დეტალებზე საუბარი შეზღუდულია.

„არ ცნობს თავს დამნაშავედ, საქმეს აქვს გრიფი სრულიად საიდუმლო. ის იყენებს დუმილის უფლებას, არაფერი ინფორმაცია არ მიუწოდებია გამოძიებისთვის. საქმესთან დაკავშირებით ვერაფერს ვერ გეტყვით“, - განაცხადა ბექა გულედანმა ჟურნალისტებთან საუბრისას.

პროკურატურის ინფორმაციით, სახელმწიფო უსაფრთხოების სამსახურის კონტრდაზვერვის დეპარტამენტის მიერ ჩატარებული გამოძიებით დადგინდა, რომ უძილაური უცხო ქვეყნის დაზვერვის დავალებით მოქმედებდა. უწყების განცხადებით, ბრალდებული სისტემატურად აგროვებდა და გადასცემდა სხვადასხვა კატეგორიის ინფორმაციას, მოქმედებდა მატერიალური სარგებლის მიღების მიზნით. აზიანებდა საქართველოს სახელმწიფო ინტერესებს.

საგამოძიებო უწყებებს არ დაუსახელებიათ ქვეყანა, რომლის სასარგებლოდაც უძილაური ჯაშუშობდა, თუმცა „რუსთავი 2“-ის ინფორმაციით, საუბარია ერთ-ერთი ევროპული სახელმწიფოს სასარგებლოდ ჯაშუშობაზე.

გიორგი უძილაურს ბრალი სისხლის სამართლის კოდექსის 314-ე მუხლის პირველი ნაწილით (ჯაშუშობა) წარედგინა. აღნიშნული მუხლი სასჯელის სახით 12 წლამდე თავისუფლების აღკვეთას ითვალისწინებს.

სასამართლო აღკვეთის ღონისძიებას მას დღეს განუსაზღვრავს.

გიორგი უძილაური 5 მაისს დააკავეს. ბოლო პერიოდში ის ფინანსთა სამინისტროს საგამოძიებო სამსახურის საზოგადოებასთან ურთიერთობის სამმართველოს უფროსი იყო.