„გმირულად იმუშავა მთელმა გუნდმა“ - ირაკლი ჩიქოვანის შეფასებები Euro NASCAR-ზე Kolkhi GRT-ის შედეგებზე
საერთაშორისო ავტოსპორტის არენაზე მოასპარეზე ქართველი მრბოლელებისთვის გასული უქმეები წარმატებული აღმოჩნდა.
Euro NASCAR-ზე მონაწილე პირველმა დამოუკიდებელმა ქართულმა გუნდმა, Kolkhi GRT-მა (Georgian Racing Team), რომელშიც დათა ქაჯაია და მარიამ დავითიძე ირიცხებიან, საფრანგეთში, „პოლ რიკარდის“ ლეგენდარულ ავტოდრომზე გამართულ ეტაპზე მაღალი შედეგები აჩვენა.დათა ქაჯაიამ ფინიშის ხაზი პირველმა გადაკვეთა და თავის კლასში წამყვანი პოზიცია დაიკავა. მანამდე კი იმავე ტრასაზე ქართველმა პილოტმა, რომელიც უმაღლეს, PRO კლასში გამოდის, მეორე პოზიციაც დაისაკუთრა.რაც შეეხება მარიამ დავითიძეს მან Euro NASCAR-ზე, საფრანგეთის ტრასაზე მომხდარი ინციდენტის მიუხედავად, ჯერ მესამე, შემდგომ კი მეორე პოზიციის დაკავება მოახერხა.
მიუხედავად იმისა, რომ Kolkhi GRT სულ მეორე ეტაპს ატარებს საერთაშორისო სარბოლო არენაზე, უკვე მოახერხა ყურადღების მიპყრობა როგორც შედეგებით, ისე ბრძოლისუნარიანობით. BMG ბიზნესმენ და Kolkhi GRT-ის დამფუძნებელ ირაკლი ჩიქოვანს ესაუბრა, რომლის შეფასებითაც, ეს შედეგი განსაკუთრებით მნიშვნელოვანია იმის გათვალისწინებით, რომ Kolkhi GRT სრულიად ახალი გუნდია და კონკურენციას მრავალწლიანი გამოცდილების მქონე კოლექტივებს უწევს.
“Euro NASCAR-ზე არიან გუნდები, რომლებიც წლებია ამ ტრეკებზე გამოდიან, უზარმაზარი გამოცდილება და ბიუჯეტები აქვთ. ობიექტურად ბევრ კომპონენტში ჩვენზე წინ არიან, მაგრამ ამ ეტაპზე გმირულად იმუშავა მთელმა გუნდმა,“ - ამბობს ჩიქოვანი.
მისი თქმით, წარმატების ერთ-ერთი მთავარი მიზეზი მანქანის სწორი მორგება იყო კონკრეტულ ტრასაზე. ავტოსპორტში თითოეული ტრეკი განსხვავებულ ტექნიკურ გადაწყვეტას მოითხოვს, მნიშვნელობა აქვს ტრასის კონფიგურაციას, ტემპერატურას, ასფალტის ტიპს და სხვა მრავალ ფაქტორს.
„სწორად მოვარგეთ მანქანა ამ კონკრეტულ ტრეკს. ტაქტიკურადაც სწორი მონახაზი გვქონდა და ამან შედეგი გამოიღო,“ — განმარტავს იგი.