Goldman-ის დირექტორი AI-ით გამოწვეულ უმუშევრობის საფრთხეს გადაჭარბებულად მიიჩნევს

ამერიკული საინვესტიციო ბანკის, Goldman Sachs-ის აღმასრულებელმა დირექტორმა, დევიდ სოლომონმა გამოცემა New York Times-ისთვის დაწერილ OpEd-ში განაცხადა, რომ ხელოვნური ინტელექტის განვითარების ფონზე მასობრივი უმუშევრობის დაწყების შესახებ არსებული შიშები გადაჭარბებულია.

მისი შეფასებით, აშშ-ის ეკონომიკა ახალ ტექნოლოგიებთან ადაპტირებას და სამუშაო ძალის გაფართოებას შეძლებს. მიუხედავად ამისა, უოლ-სტრიტის ბანკის ხელმძღვანელი აღიარებს, რომ ახალი ტექნოლოგია შრომის ბაზარზე გარკვეულ გამოწვევებს შექმნის, თუმცა ის მაინც საზოგადოებისთვის წინ გადადგმული დიდი ნაბიჯი იქნება.

Goldman Sachs-ის ანალიზის მიხედვით, მომდევნო ათი წლის განმავლობაში ხელოვნურმა ინტელექტმა შესაძლოა მიმდინარე სამუშაო საათების 25% სრული ავტომატიზაცია შეძლოს. დევიდ სოლომონის განმარტებით, ტექნოლოგიური პროგრესი დასაქმებულებს უფრო კომპლექსური ამოცანების შესრულებისთვის გაათავისუფლებს, აამაღლებს არსებული პროფესიების სტანდარტებს და შექმნის ახალ სამუშაო ადგილებს იმ ადამიანებისთვის, რომლებსაც კომპანიებში AI სისტემების მართვა დაევალებათ. ბანკირის პროგნოზით, ავტომატიზაციის პროცესი ყველაზე მეტად საბუღალტრო, საბანკო და იურიდიულ სფეროებს შეეხება, სადაც დასაქმებულთა მოვალეობების დიდი ნაწილი რობოტიზებული გახდება.

რაც შეეხება შრომის ბაზარზე არსებულ მიმდინარე ტენდენციებს, საკონსულტაციო კომპანია McKinsey-ის კვლევა აჩვენებს, რომ გამოკითხული ორგანიზაციების 51%-ში ხელოვნურმა ინტელექტმა საწყისი და ჯუნიორ პოზიციების საჭიროება უკვე შეამცირა.