Goldman Sachs-მა S&P 500-ის სამიზნე პროგნოზი ისევ გაზარდა

წამყვანმა ამერიკულმა საინვესტიციო ბანკმა, Goldman Sachs-მა S&P 500 ინდექსის 2026 წლის სამიზნე მაჩვენებელი 7 600-დან 8 000-იან ნიშნულამდე გაზარდა, რაც ამჟამინდელ მაჩვენებელთან შედარებით 6.4%-ით მეტია.

ანგარიშის თანახმად, ბანკის გადაწყვეტილება კორპორაციული მოგების უწყვეტ ზრდასა და პირველი კვარტალის განსაკუთრებით ძლიერ ფინანსურ შედეგებს უკავშირდება. უოლ-სტრიტელი ანალიტიკოსების პროგნოზით, მიმდინარე წლის ბოლომდე ამერიკული კომპანიები დადებითი ამონაგების გენერირებას გააგრძელებენ, განსაკუთრებით ძლიერი შედეგები კი ტექნოლოგიურ კომპანიებს ექნებათ.

მნიშვნელოვანია ითქვას, რომ Goldman Sachs-მა ინდექსის წევრი კომპანიების ერთ აქციაზე მოგების (EPS) პროგნოზი მიმდინარე წლისთვის $340-მდე გაზარდა, რაც გასულ წელთან შედარებით 24%-იან მატებას ნიშნავს. 2027 წლისთვის კი მაჩვენებლის კიდევ 13%-ით, $385-მდე ზრდაა მოსალოდნელი.

ბანკის წარმომადგენლების განმარტებით, წელს S&P 500-ის მოგების ზრდის დაახლოებით ნახევარს ხელოვნური ინტელექტის ინფრასტრუქტურაში განხორციელებული ინვესტიციების ბენეფიციარები უზრუნველყოფენ.

რაც შეეხება ბაზარზე არსებულ რისკებს, ექსპერტები აქციების ფასების კორექციას არ პროგნოზირებენ და მიიჩნევენ, რომ სპეკულაციური ბუშტის არსებობის ან გახეთქვის წინაპირობები არ არსებობს. Goldman-ში იმასაც ამბობენ, რომ ამჟამინდელი მდგომარეობა არაფრის არ ჰგავს 2000-იანი წლების dot-com-ის ბუშტს ან 2008 წლის ფინანსურ კრიზისს, რადგან S&P 500-ის სათავეში მყოფი კომპანიები ყოველ კვარტალში რეკორდულად დიდი მოცულობის მოგებას იღებენ, აქციების ზრდა კი სწორედ მოგების მატებასთან არის კავშირში და არც უბრალოდ სპეკულაციასთან.

თუმცა, ბანკში აღნიშნავენ, რომ ირანის ომის გამო ენერგომატარებლების ფასების ზრდა მომხმარებელთა ხარჯებს ამცირებს, რაც ინფლაციურ ზეწოლას ზრდის და FED-ის მიერ მონეტარული პოლიტიკის შერბილების შანსებს ამცირებს.

ცნობისთვის, S&P 500 ინდექსმა მიმდინარე წელს რეკორდული მაქსიმუმი უკვე მეცხრამეტედ გადალახა - ბოლო რეკორდი ინდექსმა სწორედ გასულ 24 საათში დაამყარა. როგორც პრეზიდენტი ტრამპი აცხადებს, ხელისუფლებაში მისი ყოფნის პერიოდში ამერიკული საფონდო ბირჟა 100%-ით უნდა გაიზარდოს, რაც ბაზარს ზრდის დამატებით პოლიტიკურ სტიმულს აძლევს.