Google-მა Android-ზე დაფუძნებული ახალი ლეპტოპი წარადგინა

ამერიკულმა ტექნოლოგიურმა გიგანტმა, Google-მა ახალი თაობის ლეპტოპების ხაზი, Googlebook-ი დააანონსა, რომელიც ბაზარზე მიმდინარე წლის შემოდგომაზე გამოვა.

როგორც ირკვევა, ახალი მოწყობილობები Android-ისა და ChromeOS-ის შერწყმის შედეგად შექმნილ ოპერაციულ სისტემაზე იმუშავებს. მიუხედავად იმისა, რომ სისტემის შიდა კოდური სახელწოდება Aluminium-ია, კომპანიის წარმომადგენლობის განმარტებით, ოფიციალური ბრენდინგი მოგვიანებით გასაჯაროვდება.

არსებული ინფორმაციით, Googlebook-ის პლატფორმა Android-ის ტექნოლოგიურ ფუნდამენტზეა აგებული, რაც მას დესკტოპის დონის აპლიკაციების მხარდაჭერისა და სმარტფონებთან უწყვეტი ინტეგრაციის შესაძლებლობას აძლევს. მნიშვნელოვანია ითქვას, რომ სისტემის ყველა დონეზე Gemini-ს ხელოვნური ინტელექტი იქნება ინტეგრირებული.

ერთ-ერთ მთავარ სიახლეს Magic Pointer-ის ფუნქცია წარმოადგენს, რომელიც კურსორის ეკრანზე მითითებისას კონტექსტურ შეთავაზებებს, მაგალითად, მეილში მითითებული თარიღის მიხედვით შეხვედრის დაგეგმვას უზრუნველყოფს.

.როგორც ცნობილია, კომპანია პირველი მოდელების შესაქმნელად ისეთ პარტნიორებთან თანამშრომლობს, როგორებიცაა: Acer, Asus, Dell, HP და Lenovo. ამ ეტაპზე კონკრეტული ტექნიკური მახასიათებლები, ჩიპსეტების ტიპები ან მოწყობილობების ფასი არ სახელდება.

მნიშვნელოვანია აღინიშნოს, რომ Googlebook-ის გამოჩენა Chromebook-ების გაუქმებას არ ნიშნავს. კომპანიის განმარტებით, არსებული Chromebook-ები 10-წლიანი უსაფრთხოების განახლებების მხარდაჭერას კვლავ მიიღებენ და Googlebook-ის გაშვების შემდეგ ბაზარზე ახალი Chromebook-ებიც გამოვა. თუმცა, ანალიტიკოსთა ნაწილი მიიჩნევს, რომ Google-ის მთავარი ფოკუსი უფრო მძლავრ, Android-ზე ორიენტირებულ ახალ პლატფორმაზე გადაინაცვლებს.

ექსპერტების შეფასებით, Googlebook-ის სამიზნე აუდიტორია ის სეგმენტია, რომელიც ბიუჯეტური Windows ლეპტოპის ან MacBook Neo-ს შეძენას განიხილავს.