Google, Microsoft, Anthropic და OpenAI კიბერუსაფრთხოების შესახებ გაფრთხილებას ავრცელებენ

Google-მა, Microsoft-მა, Anthropic-მა, OpenAI-მა და ასამდე სხვა წამყვანმა კომპანიამ ღია წერილი გამოაქვეყნეს, სადაც ისინი გლობალური კიბერთავდაცვის სასწრაფო გაძლიერებას ითხოვენ.

ტექნოლოგიური სექტორის წარმომადგენელთა განცხადებით, ხელოვნური ინტელექტის სწრაფი განვითარების ფონზე, AI-ინსტრუმენტების გამოყენებით განხორციელებული თავდასხმები უახლოეს თვეებში გაცილებით მასშტაბური და დახვეწილი გახდება.

ხელმომწერები აღნიშნავენ, რომ უსაფრთხოების არსებული მოდელები ახალ გამოწვევებს ვერ გაუმკლავდებიან, ხოლო კრიტიკული ინფრასტრუქტურის დაცვის მიმართულებით არსებული რესურსების ნაკლებობა ვითარებას კიდევ უფრო ამწვავებს.

ერთობლივ მიმართვას ისეთი მსხვილი ფინანსური და ტექნოლოგიური გიგანტებიც უერთდებიან, როგორებიც Capital One-ი, MasterCard-ი, Visa, Adobe, Oracle-ი და IBM-ი არიან. კომპანიები მთავრობებს მოუწოდებენ, საავადმყოფოებსა და წყალმომარაგების ობიექტებს შესაბამისი თავდაცვითი ტექნოლოგიები და ტესტირების შესაძლებლობები სასწრაფოდ მიაწოდონ. ამასთან, წერილში ხაზგასმულია, რომ კერძო სექტორმა და სახელმწიფომ საფრთხეების მოსაგერიებლად თავისი ტექნოლოგიური და ფინანსური რესურსები სრულად უნდა გააერთიანონ.

მნიშვნელოვანია ითქვას, რომ ეს გაფრთხილება ბოლო პერიოდში გახშირებულ მასშტაბურ კიბერთავდასხმებს მოჰყვა. აშშ-ის იუსტიციის დეპარტამენტის ცნობით, ჩინელმა ჰაკერებმა აშშ-ის სენატის, NASA-ს, ფედერალური რეზერვისა და უშუალოდ იუსტიციის დეპარტამენტის ციფრულ სისტემებში შეღწევა შეძლეს. პარალელურად, AI-აგენტების მხრიდან უსაფრთხოების ბარიერების გვერდის ავლის შემთხვევებიც დაფიქსირდა. კერძოდ, OpenAI-ის ასობით AI-აგენტმა ერთმანეთთან კომუნიკაციისთვის ფარული პლატფორმა შექმნა, რასაც პოპულარულ დეველოპერულ პლატფორმა Hugging Face-ზე იერიში მოჰყვა. ეს ინციდენტი სპეციალისტებმა ხელოვნური ინტელექტის მიერ განხორციელებულ პირველ კიბერთავდასხმად შეაფასეს.

ამ მოცემულობის ფონზე, ტექნოლოგიური გიგანტები მთავრობებს გააქტიურებისა და თავდაცვითი სისტემების დროული ინტეგრაციისაკენ მოუწოდებენ.