იაპონია უმსხვილეს კრედიტორებს შორის მესამე ადგილზე ჩამოვიდა

იაპონიის ფინანსთა სამინისტროს განცხადებით, ქვეყანა 2025 წელს მსოფლიოს უმსხვილეს წმინდა კრედიტორებს შორის ჩინეთის შემდეგ მესამე ადგილზე გადავიდა, რაც გლობალურ რეიტინგში პოზიციის გაუარესებას ნიშნავს.

აღსანიშნავია, რომ ეს ცვლილება იაპონიის წმინდა საგარეო აქტივების ისტორიულ მაქსიმუმამდე გაზრდის ფონზე დაფიქსირდა, ანუ მოცულობა გაიზარდა, თუმცა ქვეყანა რეიტინგში მაინც ჩამოქვეითდა. როგორც ირკვევა, იაპონიის მთავრობის, ბიზნესისა და კერძო პირების მფლობელობაში არსებული წმინდა საგარეო აქტივები წლიურად 4.4%-ით გაიზარდა და 561.8 ტრილიონი იენი, ანუ $3.53 ტრილიონი შეადგინა.

მნიშვნელოვანია ითქვას, რომ აღნიშნული მაჩვენებელი ზედიზედ მერვე წელია იზრდება, რაც იაპონური კომპანიების მზარდმა უცხოურმა ინვესტიციებმა, შერწყმის გარიგებებმა და რეზიდენტების მფლობელობაში არსებული უცხოური ფასიანი ქაღალდების ღირებულების მატებამ განაპირობა. თუმცა, მას შემდეგ, რაც წინა წელს იაპონიამ 34 წლის განმავლობაში პირველად დათმო ლიდერობა გერმანიასთან, ამჯერად მან მსოფლიოს მეორე უმსხვილესი კრედიტორის პოზიციაც დაკარგა და ჩინეთს ჩამორჩა.

რაც შეეხება ამ დინამიკის მიზეზებს, გერმანიისა და ჩინეთის საგარეო აქტივების ზრდას ხელი ყოველწლიურმა სავაჭრო პროფიციტმა შეუწყო. პარალელურად, იაპონიის წმინდა საგარეო აქტივების ზრდის ტემპი ნაწილობრივ მისმა საგარეო ვალდებულებების მკვეთრმა მატებამ შეაფერხა. სიცხადისთვის, ეს პროცესი იაპონიის საფონდო ბირჟაზე დაფიქსირებულ ძლიერ შედეგებს უკავშირდება, რამაც არარეზიდენტი ინვესტორების მფლობელობაში არსებული იაპონური ფასიანი ქაღალდების ღირებულება $391 მილიარდით გაზარდა.