იაპონური საფონდო ინდექსი რეკორდულად გაიზარდა

იაპონური საფონდო ინდექსი დღეს რეკორდულად გაიზარდა, რაც ირანთან მიმდინარე მოლაპარაკებების ფონზე ნავთობის გაიაფებას და ინვესტორთა განწყობების გაუმჯობესებას უკავშირდება.

როგორც ირკვევა, ტოკიოს საფონდო ბირჟის წამყვანი ინდექსი Nikkei 225 სესიის განმავლობაში 2.87%-ით გაიზარდა და რეკორდულ 65,158 პუნქტზე დაიხურა, ხოლო ფართო ბაზრის Topix ინდექსმა 1.29%-ით მოიმატა და 3,942 ნიშნულს მიაღწია.

არსებული ინფორმაციით, ბაზრების ზრდა პრეზიდენტი დონალდ ტრამპის განცხადებამ განაპირობა, რომლის მიხედვითაც ირანთან მოლაპარაკებები კონსტრუქციულ რეჟიმში მიმდინარეობს და საბოლოო გარიგება საკმაოდ მალე გაფორმდება.

საყურადღებოა, რომ ჰონგ-კონგისა და სამხრეთ კორეის საფონდო ბირჟები ოფიციალური უქმე დღეების გამო დაკეტილი იყო. პარალელურად, ომში დაღუპულთა ხსოვნის დღის გამო ვაჭრობა არც ამერიკის შეერთებული შტატების საფონდო ბირჟებზე გამართულა, ანუ კაპიტალის ბაზრების ნახევარზე მეტი დღეს ისვენებდა.