ინვესტორებს ბრიტანეთის პოლიტიკური კრიზისი აშფოთებთ

გაერთიანებული სამეფოსთვის სახელმწიფო სესხის აღების ხარჯები მკვეთრად გაიზარდა, რაც პრემიერ-მინისტრ კირ სტარმერის თანამდებობაზე დარჩენასთან დაკავშირებულმა გაურკვევლობამ გამოიწვია.

არსებული ინფორმაციით, 10-წლიან სახელმწიფო ობლიგაციებზე საპროცენტო განაკვეთმა 5.13%-ს მიაღწია, რაც 2008 წლის გლობალური ფინანსური კრიზისის შემდეგ დაფიქსირებული მაქსიმალური მაჩვენებელია. პარალელურად, 30-წლიანი ობლიგაციების განაკვეთმა 5.81% შეადგინა, რაც 1998 წლის შემდეგ ყველაზე მაღალი ნიშნულია.

როგორც ირკვევა, ინვესტორების შეშფოთება პოლიტიკურ კრიზისს და მოსალოდნელ ინფლაციას უკავშირდება. თუმცა, ბრიტანეთის შემთხვევაში დამატებით რისკ-ფაქტორს ლიდერების შესაძლო ცვლილება და საბიუჯეტო ხარჯების კონტროლის შესუსტების საფრთხე ქმნის.

ამასთან, პოლიტიკურმა არასტაბილურობამ გავლენა საფონდო ბირჟასა და ეროვნულ ვალუტაზეც იქონია. საბანკო-საფინანსო სექტორში წარმოდგენილი კომპანიების აქციების შეფასება მკვეთრად შემცირდა, რაც ახალი ადმინისტრაციის მხრიდან საბანკო სექტორზე შესაძლო საგადასახადო ზეწოლის ზრდას უკავშირდება. რაც შეეხება ვალუტას, ფუნტი სტერლინგი დოლართან მიმართებით 0.5%-ით გაუფასურდა და კურსმა $1.35 შეადგინა. აგრეთვე, ბრიტანეთის მთავარი საფონდო ინდექსი, FTSE 100, ვაჭრობის გახსნისას 1%-ით შემცირდა.