ირაკლი კობახიძემ ქსელურ მარკეტებს „პროდუქტის გაიაფებისთვის“ მადლობა გადაუხადა

პრემიერ-მინისტრი ირაკლი კობახიძე ქსელურ მარკეტებს „პროდუქტის გაიაფებისთვის“ გადადგმული ნაბიჯებისთვის მადლობას უხდის. ამის შესახებ მან ჟურნალისტების კითხვის საპასუხოდ განაცხადა და დასძინა, რომ პროდუქტის გაიაფებაზე მუშაობა ფასების საპარლამენტო კომისიის რეკომენდაციის შესაბამისად გაგრძელდება.

„მადლობა კონკრეტულ ქსელებს, რომ მათ პროდუქტის გაიაფების მიმართულებით კონკრეტული ნაბიჯები გადადგეს. რაც ძალიან მნიშვნელოვანია. რაც შეეხება საშუალოვადიან პერსპექტივას, საპარლამენტო კომისიამ გამოკვეთა სტრუქტურული პრობლემები, რომელთა დაძლევის შემთხვევაში, მიწედების ჯაჭვი დამოკლდება და ეს პირდაპირ აისახება ფასების შემცირებაზე. ამას დასჭირდება საშუალოვადიან პერსპექტივაში მუშაობა, ესეც მოგვცემს შედეგს და ამაზეც აქტიურად ვიმუშავებთ“, - განაცხადა ირაკლი კობახიძემ.

ცნობისთვის, რითეილ ასოციაციის განცხადებით, ქსელური მარკეტები მომხმარებელს სოციალურ პროდუქტზე ფასდაკლებებს სთავაზობენ. სოფიო ქაშაკაშვილი ამბობს, რომ დარგობრივი გაერთიანების წევრებმა სხვადასხვა ტიპის ფასდაკლებები თითქმის ორი კვირაა რაც დაიწყეს, თუმცა თითოეული ქსელური მარკეტის მიერ „სოციალური კალათის“ ფარგლებში წარმოდგენილ პროდუქტებზე განსხვავებული ფასდაკლებები მოქმედებს. მთავრობის ადმინისტრაციის უფროსის განცხადებით, მთავრობისა და ბიზნესის კომუნიკაციისას გამოკვეთილ 15 პირველადი მოხმარების პროდუქტზე ქსელების მიერ შეთავაზებული ფასდაკლება მოკლევადიანი შედეგია და გრძელვადიანი შედეგისთვის მუშაობა უნდა გაგრძელდეს.