ირანი ჰორმუზის სრუტეში უსაფრთხო გავლისთვის კომპანიებს ბიტკოინებში გადახდას სთავაზობს

ირანის ხელისუფლებამ ჰორმუზის სრუტეში გემების გადაადგილების უსაფრთხოების უზრუნველსაყოფად ბიტკოინით ანგარიშსწორებაზე ორიენტირებული საზღვაო დაზღვევის სერვისი აამოქმედა. არსებული ინფორმაციით, ახალი პროექტი მიზნად სპარსეთის ყურესა და მიმდებარე წყლებში ტვირთების გადაზიდვის გაცილებით მარტივად დაზღვევას ისახავს.

ირანული მედია Fars-ის ცნობით, დასახელებული სისტემის ფარგლებში ფინანსური ანგარიშსწორება სრულად კრიპტოვალუტით განხორციელდება. თეირანში ვარაუდობენ, რომ ამ მექანიზმს ქვეყნისთვის $10 მილიარდამდე შემოსავლის მოტანა შეუძლია.

საყურადღებოა, რომ ანალიტიკოსები ირანის გადაწყვეტილებას ეჭვის თვალით უყურებენ. მათი შეფასებით, გაუგებარია, როგორ უნდა მოახერხოს ომში და ამერიკული ბლოკადის ქვეშ მყოფმა სახელმწიფომ ნებისმიერი ხომალდის უსაფრთხო გადაადგილების უზრუნველყოფა. სავარაუდოა, რომ ბიტკოინში გადახდით დაზღვევა მხოლოდ იმ ხომალდებს შეეხება, რომელთა გატარებაზეც თანხმობას ამერიკული მხარეც განაცხადებს.

შეგახსენებთ, რომ აშშ-სა და ირანს შორის სამხედრო კონფლიქტი უკვე მესამე თვეა გრძელდება. შტატების პრეზიდენტის, დონალდ ტრამპის მცდელობამ, იძულებითი ზომებით ირანთან შეთანხმებისთვის მიეღწია, შედეგი ვერ გამოიღო. შესაბამისად, ჰორმუზის სრუტეში საზღვაო მიმოსვლა ამ დრომდე მკაცრად შეზღუდულია. ეს კრიზისი ნავთობის ფასზე ნეგატიურად კვლავ მოქმედებს. ბრენტის ტიპის წიაღისეული საწვავის ღირებულება ბარელზე ამჟამად $110-ს აღწევს.

ცნობისთვის, ჰორმუზის სრუტე მსოფლიოში ნავთობისა და ნავთობპროდუქტების ტრანსპორტირებისთვის ერთ-ერთ ყველაზე მნიშვნელოვან სტრატეგიულ დერეფნად მიიჩნევა. ამჟამად ამ წყალსატევში კომერციული გემების გადაადგილება ორივე დაპირისპირებული მხარის მიერ თითქმის სრულად ბლოკირებულია.