ირანის ომის გამო ამერიკელებმა საწვავზე დამატებით $40 მილიარდი დახარჯეს - კვლევა

ბრაუნის უნივერსიტეტის კლიმატის გადაწყვეტილებების ლაბორატორიამ ახალი კვლევა გამოაქვეყნა. არსებული ინფორმაციით, 2026 წლის 28 თებერვალს დაწყებული ირანის ომის გამო, ამერიკელმა მომხმარებლებმა ბენზინსა და დიზელზე ზედმეტი $40 მლრდ-ზე მეტი დახარჯეს.

ეს მაჩვენებელი აჭარბებს თავად სამხედრო კამპანიის პირდაპირ ხარჯებს, რომელიც ამ დროისთვის $29 მლრდ შეადგენს. უნივერსიტეტის ექსპერტების შეფასებით, სამხედრო კონფლიქტმა არამარტო გლობალურ ეკონომიკაში, არამედ შტატებში, ლოკალურადაც გამოიწვია საწვავის, სურსათისა და სამომხმარებლო საქონლის ფასების მკვეთრი ზრდა.

ანალიტიკოსები აღნიშნავენ, რომ ჯამურად დახარჯული ფინანსური რესურსი ნებისმიერი მასშტაბური სახელმწიფო პროგრამების დაფინანსებას სრულიად უზრუნველყოფდა. დასახელებული თანხა ამერიკის შეერთებულ შტატებში 10,200-ზე მეტი ხიდის მოდერნიზაციისთვის 2024 წელს გამოცხადებული პროგრამის მთლიან ხარჯებს სრულად დაფარავდა. პარალელურად, ეს მოცულობა ქვეყნის საჰაერო მოძრაობის კონტროლის სისტემის სრული განახლებისთვისაც იქნებოდა საკმარისი. ცნობისთვის, საუბარია $31.5 მილიარდზე. საყურადღებოა, რომ საწვავის ზედმეტი დანახარჯები ორჯერ აღემატება ელექტრომობილების ფედერალური პროგრამების ბიუჯეტსაც, რომელიც $18.9 მილიარდით განისაზღვრა.

ბრაუნის უნივერსიტეტის მკვლევრები ხაზს უსვამენ, რომ საწვავის ფასების ზრდა ამერიკულ ოჯახებს მთელი ქვეყნის მასშტაბით მძიმე ტვირთად დააწვა. მომხმარებლებმა ბენზინის გაძვირება უშუალოდ ავტოგასამართ სადგურებზე იგრძნეს, დიზელის მაღალმა ფასებმა კი გადაზიდვებსა და ელექტროენერგიის გამომუშავებაზე პირდაპირი გავლენა იქონია. საშუალოდ, თითოეულმა ამერიკულმა ოჯახმა კონფლიქტის დაწყების შემდეგ საწვავზე $300-ზე მეტი დახარჯა. ანალიტიკოსების განცხადებით, ეს ენერგეტიკული შოკი ომის “ფარულ გადასახადადაა” ქცეული და ის მოსახლეობის ყოველდღიურ ხარჯებს მნიშვნელოვნად ზრდის.

ცნობისთვის, სპეციალისტებმა ზედმეტი ხარჯების ყოველდღიური მოცულობა საწვავის რეალური ფასებისა და ალტერნატიული მოდელის შედარებით დაადგინეს. კვლევის პროცესში მათ ორგანიზაციების, AAA-ისა და EIA-ის საცალო მონაცემები გამოიყენეს, მიღებული შედეგები კი აშშ-ის აღწერის ბიუროს სტატისტიკას შეუსაბამეს.