ირანმა აშშ-ს ომის დასრულების წინადადებაზე პასუხი პაკისტანის მეშვეობით გაუგზავნა

ირანის სახელმწიფო საინფორმაციო სააგენტო IRNA-ს ცნობით, თეირანმა ომის დასრულების შესახებ აშშ-ის წინადადებაზე ოფიციალური პასუხი მოამზადა და შუამავალი ქვეყნის, პაკისტანის მეშვეობით ვაშინგტონს გადასცა.

გავრცელებული ინფორმაციით, ირანის პასუხი ეფუძნება სპარსეთის ყურესა და ჰორმუზის სრუტეში საზღვაო უსაფრთხოების უზრუნველყოფას. პაკისტანურმა დიპლომატიურმა წყარომ Al Jazeera-ს დაუდასტურა, რომ დოკუმენტი ამერიკულ მხარეს უკვე მიეწოდა.

ვაშინგტონმა ირანს კვირის დასაწყისში 14-პუნქტიანი გეგმა შესთავაზა, რომელიც კონფლიქტის დეესკალაციას ისახავს მიზნად. შემოთავაზებული პირობების მიხედვით:

თეირანმა უარი უნდა თქვას ბირთვული იარაღის შექმნაზე და მინიმუმ 12 წლით შეაჩეროს ურანის გამდიდრება. ასევე, ქვეყანამ უნდა გადასცეს 60%-მდე გამდიდრებული ურანის მარაგი (დაახლოებით 440 კგ).

სანაცვლოდ, ვაშინგტონი ეტაპობრივად გააუქმებს სანქციებს, გაათავისუფლებს ირანის გაყინულ მილიარდობით დოლარის აქტივებს და შეწყვეტს ირანის პორტების საზღვაო ბლოკადას.

მოლაპარაკებების პირველი ეტაპი, გეგმის მიხედვით, საომარი მოქმედებების სრულ შეწყვეტას დაეთმობა.

ისლამაბადში Al Jazeera-ს კორესპონდენტი აღნიშნავს, რომ პაკისტანისთვის ამ შეთანხმებას კრიტიკული მნიშვნელობა აქვს. ჰორმუზის სრუტის ხანგრძლივმა ბლოკადამ მძიმე დარტყმა მიაყენა მსოფლიო ეკონომიკას, პაკისტანში კი საწვავის ფასების რეკორდული ზრდა გამოიწვია.

ამ დროისთვის ოფიციალურ ვაშინგტონს ირანისგან მიღებულ პასუხზე კომენტარი არ გაუკეთებია.