იტალიამ მეკობრული სტრიმინგ-ქსელი გამოავლინა - ზარალი €300 მილიონია

იტალიის ფინანსურმა პოლიციამ რთული მეკობრული (ე.წ. პირატული) სტრიმინგ-ქსელი გაანადგურა, რომელმაც დაახლოებით 300 მილიონი ევროს ზიანი მიაყენა საავტორო უფლებების მქონე ისეთ კომპანიებს, როგორებიც Netflix, Disney+ და Spotify არიან.

ფინანსური პოლიციის ცნობით, ოპერაცია აქამდე უცნობი ტექნოლოგიის წინააღმდეგ იყო მიმართული, რომელიც აპლიკაცია CINEMAGOAL-ის გარშემო იყო შექმნილი. ეს აპლიკაცია მომხმარებლების მოწყობილობებს უცხოურ სერვერებს უკავშირებდა, რომლებიც შემდგომ სტრიმინგ კონტენტს უკანონოდ შიფრავდნენ.

იტალიის ტერიტორიაზე ვირტუალური მანქანები 24-საათიან რეჟიმში მუშაობდნენ. ისინი ყოველ სამ წუთში ერთხელ იჭერდნენ და ხელახლა გადასცემდნენ ლეგიტიმური გამოწერების წვდომის კოდებს, რომლებიც ფიქციურ მომხმარებლებზე იყო რეგისტრირებული.

სისტემა გვერდს უვლიდა სტრიმინგ-პლატფორმების უსაფრთხოების შემოწმებებს და არ მოითხოვდა კონკრეტულ IP მისამართთან პირდაპირ კავშირს, რაც მომხმარებლების გამოვლენას ართულებდა. გამოწერები წელიწადში 40-დან 130 ევრომდე ფასად იყიდებოდა.

პოლიციის განცხადებით, ბოლონიის პროკურორებმა, ევროკავშირის სასამართლო თანამშრომლობის ორგანოსთან (Eurojust) ერთად, უზრუნველყვეს იმ უცხოური სერვერების ამოღება, სადაც გაშიფრული მონაცემები და აპლიკაციის საწყისი კოდი ინახებოდა. პარალელური ოპერაციები ჩატარდა საფრანგეთსა და გერმანიაშიც.

ფინანსურმა პოლიციამ ასევე გამოავლინა ტრადიციული არალეგალური სტრიმინგ მოწყობილობების გამოყენება, რომლებიც იტალიაში ფართოდ არის ცნობილი როგორც "pezzotto". პოლიცია 1000 იდენტიფიცირებულ მეკობრული სისტემის მომხმარებელს 154-დან 5000 ევრომდე ჯარიმას დააკისრებს.