"იტონგის" ბლოკით თუშეთში, სოფელ დოჭუში სასტუმრო შენდება - კომპანია მოთხოვნის ზრდაზე საუბრობს
კომპანია „იტონგი კავკასუსის“ სამშენებლო მასალებზე მოთხოვნა განსაკუთრებით იმ რეგიონებში იზრდება, სადაც მკაცრი კლიმატური პირობებია. ამის შესახებ კომპანიის გენერალურმა დირექტორმა, გიგა ხვინგიამ BMGTV-ის გადაცემაში „ბიზნესის კვირეული“ ისაუბრა.
მისი თქმით, გაზრდილი მოთხოვნა ფიქსირდება ნინოწმინდაში, ასევე თუშეთში - სოფელ დოჭუში, სადაც ზღვის დონიდან 2355 მეტრზე „იტონგის“ ბლოკით სასტუმრო შენდება. პროექტის სპეციფიკიდან გამომდინარე კი, სამშენებლო მასალის ნაწილის ადგილზე გადატანა ცხენებით განხორციელდება.
„ამ დღეებში უკვე დაიწყება გადაზიდვა და ცხენებით მოხდება მასალის ატანა. მთავარი მოტივი ის იყო, რომ პროდუქტი ენერგოეფექტურია და ამასთანავე მსუბუქია. დაახლოებით 800-900 მეტრი მოუწევთ ცხენებით გადატანა. ეს ალბათ ისტორიული იქნება როგორც „იტონგისთვის“, ისე მსოფლიო ბრენდისთვისაც“, - განაცხადა ხვინგიამ.
კომპანიის ხელმძღვანელის თქმით, ბოლო წლებში „იტონგი კავკასუსმა“ პროდუქციის ხარისხის მიმართულებით მნიშვნელოვანი პროგრესი განიცადა. მისი განმარტებით, ინვესტიციების განხორციელების შემდეგ არაერთი ექსპერიმენტი და ტესტირება ჩატარდა, რათა პროდუქცია ქართულ ნედლეულსა და ადგილობრივ პირობებზე მაქსიმალურად ყოფილიყო მორგებული.
„დავხვეწეთ პროდუქცია, ძალიან ბევრი ექსპერიმენტი ჩატარდა, ბევრი მცდელობა იყო ქართული ინგრედიენტებისა და ნედლეულის მორგებაზე. საბოლოოდ, მივიღეთ ძალიან მაღალი ხარისხის პროდუქტი, რომლითაც შეგვიძლია გერმანულ ქარხნებს კონკურენცია გავუწიოთ. არანაირი სხვაობა არ არის, პირიქით, ბევრ შემთხვევაში უკეთესიცაა. ეს ჩვენი დამსახურება არ არის - ეს ჩვენი ბუნების დამსახურებაა. საქართველოში მოიპოვება უნიკალური კვარცული ქვიშა, რომელსაც ძალიან მაღალი თვისებები აქვს“, - აღნიშნა მან.
მისივე ინფორმაციით, „იტონგი კავკასუსში“ ხარისხის კონტროლი დღესაც საერთაშორისო სტანდარტების შესაბამისად მიმდინარეობს. კომპანიას სამეთვალყურეო საბჭო ჰყავს, რომელშიც ხუთი წევრია, მათ შორის ორი გერმანელი, ხოლო ყველა სტრატეგიული გადაწყვეტილება გერმანელ პარტნიორებთან თანხმდება.