ჯანი ინფანტინო 2027 წელს FIFA-ს არჩევნებში კენჭს მესამედ იყრის

ჯანი ინფანტინომ ხუთშაბათს, FIFA-ს ყოველწლიურ კონგრესზე განაცხადა, რომ 2027 წელს, მისი მიმდინარე ვადის ამოწურვის შემდეგ, პრეზიდენტობისთვის კენჭისყრას კვლავ აპირებს.

ინფანტინომ ეს განცხადება მრავალსაათიანი ღონისძიების ბოლოს გააკეთა, სადაც მან ბოლო 10 წლის საქმიანობა შეაჯამა და ფიფას 211 წევრ ასოციაციას დაჰპირდა, რომ მომდევნო ოთხ წელიწადში საერთო ჯამში $2.7 მილიარდს მიიღებენ ფინანსური განაწილებების სახით.

მას უკვე აქვს მხარდაჭერა მსოფლიო ფეხბურთის ექვსი კონფედერაციიდან მინიმუმ სამისგან. აფრიკისა და აზიის კონფედერაციებმა, რომლებიც ერთად 211 წევრიდან 100-ს წარმოადგენენ, ოთხშაბათსვე განაცხადეს, რომ ინფანტინოს ხელახალ არჩევას მხარს დაუჭერენ - მანამდე, სანამ თავად ინფანტინო ოფიციალურად განაცხადებდა კანდიდატურას. მათ შეუერთდა სამხრეთ ამერიკის კონფედერაცია - CONMEBOL, რომელმაც მხარდაჭერა ჯერ კიდევ ამ თვის დასაწყისში გამოუცხადა.

ამგვარად, ინფანტინო თანამდებობაზე, დიდი ალბათობით, კვლავ ოთხწლიანი ვადით დარჩება და შესაძლოა, ერთადერთი კანდიდატიც იყოს, როგორც ეს 2019 და 2023 წლებში მოხდა.

ინფანტინო ფიფას პრეზიდენტი 2016 წელს გახდა, როდესაც რთულ არჩევნებში გაიმარჯვა მას შემდეგ, რაც კორუფციულმა სკანდალმა მისი წინამორბედი, ზეპ ბლატერი, თანამდებობიდან გადააყენა. მისი პრეზიდენტობის პერიოდში მნიშვნელოვნად გაიზარდა ფინანსური დახმარება წევრი ასოციაციებისთვის, რამაც მას ფართო მხარდაჭერა მოუტანა.

ის კონკურენციის გარეშე 2019 და 2023 წლებში აირჩიეს. მიუხედავად იმისა, რომ ფიფას წესდების მიხედვით, პრეზიდენტს მაქსიმუმ სამი ვადით შეუძლია თანამდებობაზე ყოფნა, ინფანტინომ განაცხადა, რომ 2016-2019 წლების პირველი პერიოდი არ ითვლება სრულ ვადად, რადგან ის ოთხწლიანი არ იყო. შესაბამისად, მას შეუძლია ჯამში 15 წელი დარჩეს პრეზიდენტად.

ფიფას საარჩევნო პერიოდი ოფიციალურად ხუთშაბათს დაიწყო. კანდიდატების წარდგენის ბოლო ვადაა 18 ნოემბერი, ხოლო არჩევნები გაიმართება 2027 წლის 18 მარტს, მაროკოს დედაქალაქ რაბატში.