"ხშირად ფინანსდებოდა პროექტები, რომლებიც არ ვიცოდით, რა გავლენას ახდენდა"|სამინისტროს ₾1.8-მილიარდიანი "აღიარება"

„აგროთანადაფინანსების სახელმწიფო პროგრამის“ ახალი მოდელის მიხედვით, 1-ელი ივლისიდან, "შეღავათიანი აგროკრედიტების“ გაცემის წესი და პირობები შეიცვლება.

როგორც BMG-ის სოფლის მეურნეობის სამინისტროში განუმარტეს, "შეღავათიანი აგროკრედიტის პროექტი" არ უქმდება, მაგრამ „ერთიანი ლოგიკის ფარგლებში“ იმუშავებს.

ერთ-ერთი მთავარი სიახლე არის ის, რომ თუ 2013 წლიდან მოქმედი პროექტით, შეღავათიან აგროკრედიტს გასცემენ პროექტში ჩართული ბანკები და საფინანსო ორგანიზაციები და სოფლის განვითარების სააგენტო არ მონაწილეობს საკრედიტო განაცხადის დამუშავების და კრედიტის გაცემის პროცესში, ახალი მოდელის თანახმად, სახელმწიფო თანადაფინანსების მისაღებად, ბენეფიციარის [ფიზიკური თუ იურიდიული პირი] „ბიზნესგეგმა“, პირველ რიგში, მთავრობას უნდა მოეწონოს.

დავით სონღულაშვილის უწყებაში განმარტავენ, რომ სახელმწიფოს სურს, აგროპროექტების შერჩევისას უფრო მეტი კონტროლი ჰქონდეს. მიაჩნიათ, რომ ბოლო 13 წლის განმავლობაში მოქმედი მოდელი, პირველ რიგში, ბანკის ინტერესს და უზრუნველყოფას ეფუძნებოდა, არა - სექტორულ პრიორიტეტებს.

"შეღავათიანი აგროკრედიტით" გაცემული ₾8 მილიარდამდე სესხი ბიუჯეტიდან ₾1.8 მილიარდით დასუბსიდირდა

"შეღავათიანი აგროკრედიტით" ბიზნესმა 12 წელში ₾1 მილიარდის სუბსიდია მიიღო|TOP-20 ბიზნესჯგუფი

„ხშირად ფინანსდებოდა პროექტები, რომლებიც არ ვიცოდით, რა გავლენას ახდენდა და როგორ შესრულდა... ახალი მიდგომის ლოგიკა არის ის, რომ: ფული უნდა წავიდეს იქ, სადაც რეალური ეფექტია. შესაბამისად, პირველ ეტაპზე: ფასდება ბიზნესგეგმის ხარისხი... ანუ ბანკი აფასებს, შეძლებს თუ არა ადამიანი სესხის დაბრუნებას. სახელმწიფო აფასებს, ღირს თუ არა ამ პროექტის დაფინანსება ქვეყნისთვის. ეს არის როლების გამიჯვნა, რაც აქამდე არ არსებობდა“, - ნათქვამია BMG-ის კითხვის პასუხად მომზადებულ წერილობით განმარტებაში.