კობახიძე განმარტავს, რა დათქმით იქნება უფასო სწავლება სახელმწიფო უნივერსიტეტებში

ირაკლი კობახიძის განცხადებით, სახელმწიფო უნივერსიტეტებში უმაღლესი განათლება სტუდენტებისთვის უფასო გახდება, თუმცა ინიციატივა კონკრეტულ შეზღუდვებსა და პირობებს ითვალისწინებს.

პრემიერის განმარტებით, იმ შემთხვევაში, თუ სტუდენტი სემესტრის განმავლობაში ორ საგანს ვერ ჩააბარებს, მას მესამე სემესტრიდან დაფინანსება შეუმცირდება.

„გაკეთდა ძალიან მკაფიო განცხადება უფასო უმაღლეს განათლებასთან დაკავშირებით. პირველად საქართველოში, სახელმწიფო უნივერსიტეტებში უმაღლესი განათლება იქნება უფასო სტუდენტებისთვის. აქ არის გარკვეული მექანიზმები დადგენილი იმისათვის, რომ სტუდენტებმა არ დაკარგონ მოტივაცია.

იმ შემთხვევაში, თუ სემესტრის განმავლობაში ორ საგანს ვერ აბარებს სტუდენტი, ეს ნიშნავს იმას, რომ არსებითად არ არის საფუძვლიანად ჩართული სასწავლო პროცესში. ამ შემთხვევაში უკვე გათვალისწინებულია მესამე სემესტრიდან დაფინანსების შემცირება, რასაც აქვს ერთადერთი მიზანი, ეს არის მოტივაციის გაზრდა სტუდენტებისთვის“, - განაცხადა კობახიძემ.

ცნობისთვის, უმაღლესი განათლების დაფინანსების ახალი მოდელის დანერგვის პირველი ეტაპისთვის სახელმწიფო ბიუჯეტიდან დამატებით 42 მილიონი ლარი გამოიყოფა და 2027 წელს უმაღლესი განათლების დაფინანსების საერთო მოცულობა 170 მილიონ ლარს მიაღწევს.