კოსტავა 49 - ისტორიული შენობის ახალი სიცოცხლე და პროექტი, რომლითაც Immobiliare დეველოპერულ ბაზარზე შევიდა
BM.GE|bm.ge
თბილისში იშვიათია შემთხვევა, როდესაც ისტორიული არქიტექტურა თანამედროვე ურბანულ ხედვასთან ისე ერთიანდება, რომ ქალაქის მეხსიერებაც შენარჩუნდეს და მომავლისთვის ახალი სტანდარტიც შეიქმნას. სწორედ ასეთ ამბიციას ატარებს კოსტავას ქუჩის 49 ნომერში მიმდინარე პროექტი, რომელიც კომპანია Immobiliare-ის პირველი დეველოპერული პროექტია და, ამავდროულად, DMG Group-ის მრავალწლიანი განვითარების სტრატეგიის ერთ-ერთ ყველაზე მნიშვნელოვან ეტაპს წარმოადგენს.
1936 წელს აშენებული ნაგებობა, რომელიც თავდაპირველად ჩაის მრეწველობის ცენტრალურ ადმინისტრაციულ შენობას წარმოადგენდა, მოგვიანებით კი სოფლის მეურნეობის სამინისტროს მასპინძლობდა, თბილისის ურბანული ისტორიის ერთ-ერთ მნიშვნელოვან ნაწილად იქცა. დღეს ამ ისტორიულ შენობას სრულიად ახალი ფუნქცია ეძლევა, თუმცა პროექტის ავტორები ხაზგასმით ამბობენ, რომ მთავარი ღირებულება სწორედ მისი ისტორიისა და არქიტექტურული იდენტობის შენარჩუნებაა.
DMG Group-ის დამფუძნებლის, კახი ჟორდანიას თქმით, კომპანიისთვის დეველოპერულ სექტორში შესვლა სპონტანური გადაწყვეტილება არასოდეს ყოფილა. წლების განმავლობაში მიმდინარეობდა ისეთი პროექტის ძიება, რომელიც მხოლოდ კომერციულ წარმატებაზე არ იქნებოდა ორიენტირებული.
„დეველოპმენტში შემოსვლას ჩვენი კომპანია ძალიან დიდი ხნის განმავლობაში გეგმავდა. არ გვინდოდა უბრალოდ რაღაც მიწის ნაკვეთი გვეყიდა, აგვეშენებინა გარკვეული რაოდენობის კვადრატული მეტრები და შემდეგ სხვა პროექტზე გადავსულიყავით. ჩვენთვის მნიშვნელოვანი იყო ისეთი პროექტის პოვნა, რომელსაც საკუთარი ხასიათი ექნებოდა და რომლის მეშვეობითაც ჩვენს ხედვას წარმოვაჩენდით,“ — ამბობს ჟორდანია.
მისი თქმით, კოსტავა 49 სწორედ ის პროექტი აღმოჩნდა, რომელიც კომპანიის ფილოსოფიას ყველაზე ზუსტად გამოხატავდა.
„ძალიან მნიშვნელოვანი იყო, რომ ისეთი ადგილი მოგვეძებნა, რითიც მომავალში თავად ვიამაყებდით და იმედი გვაქვს, ქალაქიც იამაყებს.“
ისტორიული მემკვიდრეობის შენარჩუნება პროექტის მთავარი ნაწილია
პროექტის კონცეფცია ისტორიული შენობის შენარჩუნებასა და მის თანამედროვე არქიტექტურასთან ინტეგრირებას ეფუძნება. კომპანიის ინფორმაციით, შენობის არსებული ფასადი სრულად აღდგება და შენარჩუნდება, ხოლო ახალი მოცულობები ისე დაპროექტდება, რომ ისტორიულ ნაწილთან ერთიან არქიტექტურულ კომპოზიციას ქმნიდეს.
„ჩვენთვის ძალიან მნიშვნელოვანი იყო, რომ ისტორიული ფასადი შეგვენარჩუნებინა. სწორედ ამიტომ მჭიდროდ ვიმუშავეთ ქალაქის ისტორიულ საბჭოსთან და მივიღეთ გადაწყვეტილება, რომ შენობის ფასადი სრულად აღდგება. ახალი არქიტექტურაც ამ ისტორიული ფასადიდან და მისი ესთეტიკიდან გამომდინარეობს,“ — აღნიშნავს კახი ჟორდანია.
მისივე განმარტებით, პროექტის მიზანი არსებული შენობის ჩანაცვლება კი არა, მისი ისტორიული ღირებულების შენარჩუნებაა.
„ყველანაირად შევეცადეთ, ახალი კონსტრუქციაც და ძველიც ერთმანეთთან ჰარმონიაში ყოფილიყო და თანამედროვე არქიტექტურა სწორედ ისტორიული შენობიდან გამომდინარეობდეს.“
Ricardo Bofill Taller de Arquitectura — როდესაც არქიტექტურა იწყება ქალაქის შესწავლით
პროექტის ყველაზე მნიშვნელოვანი კომპონენტი მსოფლიოში ცნობილი ესპანური არქიტექტურული ბიუროს — Ricardo Bofill Taller de Arquitectura-ს — მონაწილეობაა. სტუდია, რომელმაც ევროპის, აზიისა და ამერიკის ათეულობით მნიშვნელოვანი პროექტი შექმნა, თბილისში მხოლოდ შენობის დასაპროექტებლად არ ჩამოსულა.
კახი ჟორდანიას თქმით, პაბლო ბოფილის გუნდი ორი თვის განმავლობაში სწავლობდა ქალაქს, მის არქიტექტურულ ფენებს, საბჭოთა მემკვიდრეობასა და თანამედროვე ურბანულ განვითარებას, მხოლოდ ამის შემდეგ დაიწყო უშუალოდ პროექტზე მუშაობა.
„წარმოიდგინეთ, სანამ პროექტის არქიტექტურაზე მუშაობას დაიწყებდნენ, დაახლოებით ორი თვის განმავლობაში მთელი გუნდი თბილისში იმყოფებოდა. ისინი სწავლობდნენ როგორც საბჭოთა, ისე თანამედროვე თბილისის არქიტექტურას. მხოლოდ ამის შემდეგ დაიწყეს პროექტზე მუშაობა.“
სწორედ ეს გახდა პარტნიორის არჩევის მთავარი მიზეზიც.
„ძალიან ბევრ ევროპელ არქიტექტორთან გვქონდა საუბარი, მაგრამ ჩვენთვის მნიშვნელოვანი იყო ისეთი გუნდის არჩევა, რომელიც თბილისურ ხასიათს, ქართულ კულტურასა და ქალაქის ისტორიას პატივს სცემდა.“
პროექტის ვიზუალური ენა სწორედ ამ კვლევის შედეგია. ღრმა თაღები, ბუნებრივი ქვის გამოყენება, ენერგოეფექტური GFRC ფასადური სისტემები, თხელი ფოლადის პროფილები და მაღალი ხარისხის მინაპაკეტები ქმნის არქიტექტურას, რომელიც ერთდროულად ისტორიულია და თანამედროვე.
საერთაშორისო პარტნიორების მონაწილეობა
Immobiliare-ის ინფორმაციით, პროექტის განხორციელებაში არაერთი საერთაშორისო კომპანია მონაწილეობს.
ფასადისა და საინჟინრო მიმართულებაზე მუშაობს გერმანული Werner Sobek, ველნეს სივრცეების კონცეფცია შვეიცარიულ Resense-ს ეკუთვნის, ხოლო ფიტნეს ინფრასტრუქტურა Technogym-ის მონაწილეობით იგეგმება. პარტნიორებს შორის ასევე არიან განათების, კონსტრუქციული ინჟინერიისა და სამშენებლო მენეჯმენტის საერთაშორისო კომპანიები.
„არაერთ საერთაშორისო კომპანიასთან ვთანამშრომლობთ. საინჟინრო მიმართულებას აკეთებს Werner Sobek, სპას კონცეფცია Resense-მა შექმნა, ხოლო ფიტნეს სივრცე Technogym-ის მონაწილეობით დაიგეგმა. პარალელურად მიმდინარეობს მოლაპარაკებები სხვადასხვა საერთაშორისო ოპერატორთან, რომლებიც პროექტში სხვადასხვა ფუნქციურ სივრცეს განავითარებენ,“ — ამბობს კახი ჟორდანია.
პროექტის მიხედვით, კომპლექსში განთავსდება მაღალი კლასის საცხოვრებელი აპარტამენტები, კომერციული სივრცეები, რესტორანი, ველნეს ცენტრი, ფიტნეს სივრცე, Residents' Club, მიწისქვეშა პარკინგი და სხვა სერვისები.
პროექტი სულ 81 აპარტამენტს მოიცავს
კოსტავა 49 მხოლოდ საცხოვრებელი პროექტი არ იქნება. კომპლექსში განთავსდება 81 რეზიდენცია, სასტუმრო, ბიზნეს კლასის კომერციული სივრცეები, Fine Dining რესტორანი, Residents' Club, სპა, ველნეს ცენტრი, Technogym-ის ფიტნეს სივრცე, მიწისქვეშა პარკინგი და მრავალფეროვანი კონსიერჟ-სერვისები. მშენებლობის დასრულება 2027 წლის ბოლოსთვის არის დაგეგმილი.
Residents' Club მოიცავს lounge-ს, cigar room-ს, cocktail bar-სა და სხვა საერთო სივრცეებს, რომლებიც პროექტის სოციალურ ცენტრს შექმნის.
Resense-ის მიერ შემუშავებული სპა ეფუძნება თბილისის ისტორიულ აბანოებსა და გეოთერმულ კულტურას, ხოლო Technogym-ის სივრცე რეგიონში პირველ სპეციალიზებულ სარეაბილიტაციო ზონას მოიცავს.
პროექტში ასევე გათვალისწინებულია 24/7 კონსიერჟი, smart-აპლიკაცია, housekeeping, valet service, room service, ქიმწმენდა და სხვა მომსახურებები, რაც საერთაშორისო რეზიდენციების სტანდარტს შეესაბამება.
200 მილიონი ლარის ინვესტიცია — მხოლოდ დასაწყისი
კოსტავა 49-ის საინვესტიციო მოცულობა დაახლოებით 200 მილიონ ლარს აღწევს. თუმცა DMG Group-ში ამას დამოუკიდებელ საინვესტიციო პროექტად არ განიხილავენ.
„კოსტავა 49 ჩვენი აქტიური პროექტია და დაახლოებით 200 მილიონი ლარის ინვესტიციას მოითხოვს,“ — ამბობს კახი ჟორდანია.
მისივე თქმით, ეს იქნება პირველი ნაბიჯი გაცილებით ფართო ურბანული ტრანსფორმაციისკენ, რომელიც კოსტავას მიმდებარე ტერიტორიას, ყოფილი აბრეშუმისა და თამბაქოს ქარხნებსა და ლაგუნა ვერესაც მოიცავს.
„ისტორიული შენობების შენარჩუნება და მათთვის ახალი სიცოცხლის მინიჭება იქნება ჩვენი მთავარი პრიორიტეტი.“
DMG Group-ის შეფასებით, კოსტავა 49-ის შემდეგ დაგეგმილი პროექტების ჯამური ღირებულება მილიარდ ლარს გადააჭარბებს. ეს კი ნიშნავს, რომ დღეს მიმდინარე პროექტი მხოლოდ ერთი შენობის განახლება კი არა, თბილისის ერთ-ერთი ყველაზე მასშტაბური ურბანული ტრანსფორმაციის დასაწყისია.
ექსკლუზიური ინტერვიუ კახი ჟორდანიასთან - DMG Group-ის და Immobiliare-ს დამფუძნებელთან
