კულტურის სამინისტრო 26 მაისთან დაკავშირებით ბილბორდების განთავსებისთვის "ალმას" ₾440 ათასს გადაუხდის
კულტურის სამინისტრო 26 მაისთან დაკავშირებით ტექსტური და ვიზუალური მასალის დამზადებისა და განთავსებაში 440 ათას ლარს გადაიხდის.
გამარტივებული შესყიდვის მოთხოვნით სამინისტრომ შესყიდვების სააგენტოს უკვე მიმართა.
"დამოუკიდებლობის დღის - 26 მაისისადმი მიძღვნილი ღონისძიებების ორგანიზების სამოქმედო გეგმის დამტკიცების შესახებ“ საქართველოს მთავრობის 2026 წლის 25 მარტის განკარგულების შესაბამისად, განისაზღვრა საქართველოს დამოუკიდებლობის დღის - 26 მაისისადმი მიძღვნილი ღონისძიებების ორგანიზების სამოქმედო გეგმა. აღნიშნული გეგმის მიხედვით, კულტურის სამინისტროს დაევალა, მათ შორის, შემდეგი ღონისძიებების ორგანიზება: ადმინისტრაციულ შენობებზე ბანერებისა და კონსტრუქციების დამზადება − მონტაჟი/დემონტაჟი.
26 წლის მაისის ღონისძიებების აღნიშვნისათვის დაგეგმილია მასშტაბური ღონისძიებები. ღონისძიებების შესახებ საზოგადოების ინფორმირების, ინფორმაციის ხელმისაწვდომობის გაზრდისათვის მნიშვნელოვანია საინფორმაციო ხასიათის სარეკლამო მასალის (ბილბორდები, ლაითბოქსები, მონიტორებზე ინფორმაციის განთავსება) დამზადება და დამონტაჟება თბილისსა და საქართველოს სხვადასხვა ქალაქში", - წერია სააგენტოზე გამოქვეყნებულ დოკუმენტში.
კულტურის სამინისტრო ხელშეკრულებას კომპანია "ალმას" უფორმებს, რადგან ბანერების განთავსებაზე ქვეყნის დიდ ქალაქებში ექსკლუზიური უფლება მხოლოდ მას აქვს.
"შესყიდვის ობიექტის დანაწევრება შეუძლებელია, რადგან შპს "ალმა" სარგებლობს სარეკლამო და საინფორმაციო მასალების განთავსების ექსკლუზიური უფლებით რეკლამის განთავსების ადგილებში. შესაბამისად, აღნიშნული მომსახურების შესყიდვა უნდა განხორციელდეს შპს "ალმასგან", - აღნიშნულია დოკუმენტში.
სარეკლამო მასალების მონტაჟი/განთავსება 13 მაისიდან 26 მაისის ჩათვლით უნდა მოხდეს.