კვირის მთავარი ავტო სიახლეები

კვირის მთავარ ავტო სიახლეებს წარმოგიდგენთ "თეგეტა"

ჰიბრიდების მეფე: Toyota-ს გლობალური დომინაცია

ელექტრომობილების არასტაბილური ბაზრის ფონზე, Toyota ჰიბრიდების სეგმენტში პოზიციებს იმყარებს. 2025 წელს იაპონურმა გიგანტმა გლობალურად რეკორდული, 4.4 მილიონი ჰიბრიდი გაყიდა, რითაც ისტორიულ 27 მილიონიან ნიშნულს გადააჭარბა. ბრენდის წარმატებას საწარმოო ხაზებში ჩადებული 912-მილიონიანი ინვესტიცია და აშშ-ის ბაზარზე მოთხოვნის 17.6%-იანი ზრდა განაპირობებს. RAV4-ისა და Camry-ის ლიდერობით, ამერიკაში გაყიდული ყოველი მე-15 ავტომობილი Toyota-ს ჰიბრიდია, რაც კომპანიის გრძელვადიანი სტრატეგიის ეფექტურობას ადასტურებს.

ბუმის ახალი ფაზა: ელექტრომობილების წილი გლობალურ ბაზარზე 30%-ს უახლოვდება

ახლო აღმოსავლეთის კონფლიქტით გამოწვეული ენერგოკრიზისის ფონზე, ენერგეტიკის საერთაშორისო სააგენტოს (IEA) ანგარიში ელექტრომობილების (EV) გაყიდვების ახალ რეკორდს პროგნოზირებს. მიმდინარე წელს გლობალური გაყიდვები 23 მილიონ ერთეულს მიაღწევს, რაც მთლიანი ავტობაზრის თითქმის 30%-ია. მართალია, აშშ-სა და ჩინეთში შიდა პოლიტიკის გამო პირველ კვარტალში გაყიდვები 8%-ით დაეცა, თუმცა ეს კლება ევროპაში (30%) და აზია-წყნარი ოკეანის რეგიონში (80%) დაფიქსირებულმა მკვეთრმა ზრდამ გადაფარა. ჩინეთი კვლავ წარმოების მთავარ ცენტრად რჩება და გლობალური ბაზრის 75%-ს აკონტროლებს, ხოლო 2035 წლისთვის მსოფლიოში ელექტრომობილების რაოდენობა, სუბსიდირების გარეშეც, 510 მილიონამდე გაიზრდება.

მოსაკრებელი ალტერნატიული ტრანსპორტისთვის: აშშ-ში ახალი საგზაო გადასახადი იგეგმება

აშშ-ის კონგრესში წარდგენილი ორპარტიული კანონპროექტით, 2027 წლის სექტემბრიდან ელექტრომობილებისა და ჰიბრიდების მფლობელებისთვის გზების მოვლის ყოველწლიური გადასახადი დაწესდება. ინიციატივის მიხედვით, EV-ების მოსაკრებელი $130-ით განისაზღვრება (მაქსიმუმ $150-მდე ზრდით), ხოლო ჰიბრიდების — $35-ით. პროექტის ავტორების, სემ გრეივსისა და რიკ ლარსენის განცხადებით, ეს ნაბიჯი ბიუჯეტში ინფრასტრუქტურული სახსრების მობილიზებას უზრუნველყოფს, რაც აქამდე მხოლოდ საწვავის აქციზით ხდებოდა. ინდუსტრიის ასოციაცია ZETA ინიციატივას ეკოლოგიური ტრანსპორტის არაპროპორციულ დასჯად მიიჩნევს და ალტერნატიულ, სამართლიან მოდელს ითხოვს.

ჩინური ექსპანსია ევროპაში: Stellantis-ი და Dongfeng-ი ერთობლივ საწარმოს ქმნიან

საავტომობილო გიგანტმა Stellantis-მა ჩინურ სახელმწიფო ავტოკონცერნ Dongfeng-თან მემორანდუმი გააფორმა, რომელიც საფრანგეთში, რენის ქარხანაში, ჩინური პრემიუმ ბრენდის, Voyah-ს მოდელების ერთობლივ წარმოებას ითვალისწინებს. სტრატეგიულ საწარმოში Stellantis-ი საკონტროლო 51%-იან წილს ფლობს, Dongfeng-ი კი — 49%-ს, რაც ჩინურ მხარეს ევროპულ ბაზარზე დისტრიბუციის გაფართოების საშუალებას მისცემს. ეს ნაბიჯი Stellantis-ის უფრო ფართო აზიური სტრატეგიის ნაწილია — კომპანიამ მიმდინარე თვეში Dongfeng-თან 1 მილიარდი ევროს ღირებულების კიდევ ერთი კონტრაქტი გააფორმა ჩინეთში Jeep-ისა და Peugeot-ს წარმოებაზე, ამასთან კი ესპანეთის ქარხანას ჩინურ Leapmotor-ს უთმობს Opel-ის ახალი ელექტრომობილის შესაქმნელად. საერთაშორისო ალიანსების გაძლიერებით Dongfeng-ი, რომელიც Stellantis-ის აქციონერიცაა, ჩინეთის შიდა ბაზარზე არსებული საფასო ომის ფონზე გაყიდვების დივერსიფიკაციას ევროკავშირში ცდილობს.

ევროპული რობოტაქსების პიონერი: Verne-მა ზაგრებში ავტონომიური სერვისი ჩაუშვა

Uber-ისა და ჩინური Pony.ai-ის მხარდაჭერით, ხორვატიულმა კომპანია Verne-მა ზაგრებში 10 თვითმართვადი ავტომობილით საპილოტე უპილოტო ტაქსის სერვისი აამოქმედა. მიუხედავად რთული საგზაო ინფრასტრუქტურისა, ათიათასობით კილომეტრის მანძილზე ავარია არ დაფიქსირებულა და მგზავრობები, უსაფრთხოების ოპერატორის თანხლებით, სტაბილურად სრულდება. 1.99-ევროიანმა ხელმისაწვდომმა ტარიფმა 4 000-კაციანი მოლოდინის სია შექმნა. კომპანია წლის ბოლომდე სრულად უპილოტო რეჟიმზე გადასვლას გეგმავს და ამასთან გაფართოებას ევროკავშირის, ბრიტანეთისა და ახლო აღმოსავლეთის 11 ქალაქში აპირებს.