„ლიბრე“ ვადაგასულ სურსათს ყიდდა - სეს-მა ₾5 000-ით დააჯარიმა და პროდუქტის წარმოება შეუჩერა

სეს-მა „ლიბრე“ დარღვევბის ₾5 000-ით დააჯარიმა და კონკრეტული პროდუქტის წარმოება შეუჩერა. მიზეზი ვადაგასული სურსათის რეალიზაციაა.

სურსათის ეროვნულმა სააგენტოს ინფორმაციით, უწყებამ სოციალურ ქსელში გავრცელებული ინფორმაციის საფუძველზე ( ცხოველის, კატის არსებობა სასურსათო სივრცეში), სახელმწიფო კონტროლი (არაგეგმური ინსპექტირება) განახორციელა ს/ს „ნიკორა ტრეიდში“ („ლიბრე“, ს/კ 206255808 მის: ქ. თბილისი, რუსთავის გზატკეცილი 19).

"ინსპექტირებისას ობიექტზე დაფიქსირდა კრიტიკული შეუსაბამობების განმეორების ფაქტი, ასევე ვადაგასული სურსათის რეალიზაცია, რის გამოც ბიზნესოპერატორი დაჯარიმდა 5000 ლარით და შეუჩერდა კონკრეტული საწარმოო პროცესი. ვადაგასული სურსათი დაილუქა და სურსათის ეროვნული სააგენტოს ზედამხედველობით განადგურდება", - ნათქვამია სეს-ის გავრცელებულ ინფორმაციაში.

სააგენტო მოუწოდებს მომხმარებელს, სურსათის შეძენისას ყურადღება მიაქციოს ეტიკეტს, სურსათის შენახვისა და რეალიზაციის პირობებს და ნებისმიერი დარღვევის აღმოჩენის შემთხვევაში, აცნობოს გარემოს დაცვისა და სოფლის მეურნეობის სამინისტროს ცხელ ხაზს - 1501.

არცერთი შეტყობინება რეაგირების გარეშე არ დარჩება.