ლონდონის ცენტრალურ ლოკაციებზე საქართველოს შესახებ 46 გარე რეკლამა განთავსდა - GNTA კამპანიის მიზანზე

ლონდონის სხვადასხვა ცენტრალურ ლოკაციაზე საქართველოს შესახებ გარე რეკლამები განთავსდა - ინფორმაციას ტურიზმის ეროვნული ადმინისტრაცია ავრცელებს.

მათივე ცნობით, ადმინისტრაციის ორგანიზებით დიდ ბრიტანეთში მასშტაბური მარკეტინგული კამპანია მიმდინარეობს.

„კამპანიის ფარგლებში ლონდონის ცენტრალურ ქუჩებსა და მთავარ მოედნებზე საქართველოს ტურისტული მიმართულების შესახებ სარეკლამო ბილბორდები განთავსდა. საერთო ჯამში, 46 გარე სარეკლამო ბანერი, რომელიც მოიცავს როგორც ციფრულ, ასევე სტატიკურ რეკლამას.

კამპანიის მიზანია საქართველოს, როგორც ტურისტულად მრავალფეროვანი და კონკურენტუნარიანი მიმართულების პოპულარიზაცია ბრიტანულ ბაზარზე.

კამპანიის ფარგლებში, ერთი წლის განმავლობაში, ლონდონში საქართველოს შესახებ საიმიჯო ვიდეორგოლებსა და ფოტო კოლაჟებს 17 მილიონზე მეტი ადამიანი იხილავს“, - ნათქვამია ტურიზმის ეროვნული ადმინისტრაციის გავრცელებულ ინფორმაციაში.

უწყებაში აღნიშნავენ, რომ დიდი ბრიტანეთი საქართველოსთვის მნიშვნელოვან ტურისტულ ბაზარს წარმოადგენს, 2026 წლის პირველ კვარტალში, გაერთიანებული სამეფოდან საქართველოში +45.7%-ით მეტი ვიზიტი შედგა, 2025 წლის ანალოგიურ პერიოდთან შედარებით. საქართველოში ამ მიმართულებიდან სულ 9 476 ვიზიტი შესრულდა.

რაც შეეხება 2025 წლის სტატისტიკას, შარშან ვიზიტების რაოდენობა 39.1%-ით 45 018-მდე გაიზარდა.

თბილისსა და ლონდონს შორის პირდაპირ ფრენებს ასრულებენ ავიაკომპანიები: British Airways და Easyjet.