Mango-ს დამფუძნებლის, მილიარდერი ისაკ ანდიკის მკვლელობის ბრალდებით მისი შვილი დააკავეს
გლობალურად ცნობილი ესპანური მოდის ჯგუფის, Mango-ს დამფუძნებლის შვილი მამის, ბიზნესმენ ისაკ ანდიკის გარდაცვალების გამო ეჭვმიტანილის სტატუსით დააკავეს.
ისაკ ანდიკი 2024 წლის 14 დეკემბერს ბარსელონიდან ჩრდილო-დასავლეთით დაახლოებით 40 კილომეტრში, მონსერატის მთებში ოჯახური გასეირნების დროს გადმოვარდა და დაიღუპა. ის მაშინ 71 წლის იყო.
მისი ვაჟი, ჯონათან ანდიკი სამშაბათს, 19 მაისს ბარსელონაში დააკავეს. ამის შესახებ სახელმწიფო მაუწყებელი და სხვა მედიასაშუალებები გამოძიებასთან დაახლოებულ წყაროებზე დაყრდნობით იუწყებიან. დაკავების ფაქტი პოლიციის სპიკერმაც დაადასტურა.
თავდაპირველად მიიჩნეოდა, რომ Mango-ს დამფუძნებლის სიკვდილი უბედური შემთხვევა იყო. თუმცა, გამოძიების მსვლელობისას ეჭვები გაჩნდა და გამოძიების მთავარი მოქმედი პირი საბოლოოდ გარდაცვლილის ვაჟი გახდა.
კატალონიის პოლიციის ამჟამინდელი მონაცემებით, ჯონათან ანდიკი ერთადერთი ადამიანი იყო, ვინც Mango-ს დამფუძნებელს ახლდა იმ მომენტში, როდესაც ის 150 მეტრის სიმაღლიდან გადავარდა და სასიკვდილო ტრავმები მიიღო.
გავრცელებული ინფორმაციით, პოლიციამ მის ჩვენებებში წინააღმდეგობები აღმოაჩინა. ისაკ ანდიკის პარტნიორმა, პროფესიონალმა გოლფის მოთამაშემ, ესტეფანია კნუტმა განაცხადა, რომ მამა-შვილს ცუდი ურთიერთობა ჰქონდათ.
როგორც RTVE იუწყება, 44 წლის ჯონათან ანდიკს ბრალად გაუფრთხილებლობით სიცოცხლის მოსპობა ედება. ეჭვმიტანილი ბარსელონას გამომძიებელი მოსამართლის წინაშე სამშაბათს წარდგა.
მოსმენის შემდეგ მოსამართლემ მას წინასწარი პატიმრობა შეუფარდა, რაც შესაძლოა 1 მილიონი ევროს ოდენობის გირაოს სანაცვლოდ შეჩერდეს.
ჯერჯერობით უცნობია, აპირებს თუ არა ეჭვმიტანილი გირაოს გადახდას. გათავისუფლების შემთხვევაში, მას პასპორტის ჩაბარება, ესპანეთში დარჩენა და კვირაში ერთხელ სასამართლოში გამოცხადება მოუწევს.