მარკ როტკოს ტილო Sotheby’s-ის აუქციონზე $85.8 მილიონად გაიყიდა

მარკ როტკოს ნამუშევარი Brown and Blacks in Reds (1957) ნიუ-იორკში, Sotheby’s-ის აუქციონზე 85.8 მილიონ დოლარად გაიყიდა რითაც მხატვრის ისტორიაში აუქციონზე გაყიდული მეორე ყველაზე ძვირად ღირებული ნამუშევარი გახდა.

აუქციონი Sotheby’s-ის მედისონ ავენიუს სათავო ოფისში გაიმართა, აუქციონზე ჯამში 433.1 მილიონი დოლარის ნამუშევრების გაიყიდა. შედარებისთვის, გასული წლის ანალოგიური აუქციონის შედეგი 186.1 მილიონ დოლარს შეადგენდა.

როტკოს ტილო თავდაპირველად 70-დან 100 მილიონ დოლარამდე იყო შეფასებული. ნამუშევარი თავდაპირველად ალკოჰოლური სასმელების მაგნატის, ჯოზეფ სიგრამის კოლექციაში ინახებოდა, ხოლო 2003 წელს ის ნიუ-იორკის Christie’s-ის აუქციონზე რობერტ მნუჩინმა 6.7 მილიონ დოლარად შეიძინა.

როტკოს ყველაზე ძვირად გაყიდული ნამუშევარი დღემდე Orange, Red, Yellow (1961) რჩება, რომელიც 2012 წელს Christie’s New York-ის აუქციონზე 86.9 მილიონ დოლარად გაიყიდა.

აუქციონზე ასევე გაიყიდა როტკოს კიდევ ერთი ნამუშევარი — No. 1 (1949), რომლის ღირებულებამ 20.8 მილიონ დოლარს მიაღწია. აღნიშნული ტილო 2017 წელს Christie’s-ის მიერ ლონდონში ჩატარებულ აუქციონზე 13 მილიონ დოლარად გაიყიდა.

ნიუ იორკში გამართულ აუქციონზე ნიუ-იორკელი არტ-დილერის, რობერტ მნუჩინისა და მისი მეუღლის, ადრიანას კოლექციიდან 11 ნამუშევარი გაიყიდა, მათ შორის ვილემ დე კუნინგის, ფრანც კლაინის და პაბლო პიკასოს ნამუშევრები. მთლიანობაში ლოტები 166.3 მილიონ დოლარად გაიყიდა.