მარკო რუბიოს თქმით, აშშ-მა ირანის წინააღმდეგ სამხედრო ოპერაცია ოფიციალურად დაასრულა

აშშ-მა ირანის წინააღმდეგ ორთვიანი სამხედრო კამპანია ოფიციალურად დაასრულა. თეთრ სახლში გამართულ ბრიფინგზე სახელმწიფო მდივანმა განაცხადა, რომ ოპერაცია შეწყდა. როგორც ირკვევა, ვაშინგტონი ახლა თავდაცვით პოზიციაზე გადადის. აღსანიშნავია, რომ მსგავსი განცხადება თავდაცვის მდივანმა პიტ ჰეგსეტმა გუშინ გაავრცელა და თქვა, რომ ამ მომენტისთვის ამერიკის პრიორიტეტი ცეცხლის შეწყვეტის შეთანხმების დაცვაა. საყურადღებოა, რომ ირანი ჰორმუზის სრუტეში თავდასხმებს აგრძელებს. ბოლო დღეებში დაიბომბა არაერთი ნავთობტანკერი, ასევე რაკეტები მოხვდა არაბთა გაერთიანებული საამიროების ფუჯერიას ინდუსტრიუკ კომპლექსს და ომანში მდებარე საცხოვრებელ კორპუსს.

როგორც ირკვევა, ამჟამად შტატების ახალი თავდაცვითი სტრატეგია სავაჭრო გემების მოძრაობის აღდგენას ისახავს მიზნად. მარკო რუბიომ წარადგინა ინიციატივა, რომელიც საზღვაო მიმოსვლის დაცვას გულისხმობს. სახელმწიფო მდივანი იმედოვნებს, რომ მისი გეგმა ჰორმუზის სრუტეს რეალურად გაათავისუფლებს ირანული საფრთხისაგან. როგორც ირკვევა, ინიციატივის ფარგლებში მთავარი ტვირთი ამერიკის შეერთებულ შტატებზე მოვა. ცნობისთვის, ამ დრომდე ამერიკული ფლოტის დაცვით ტერიტორიის გავლა მხოლოდ ორმა გემმა შეძლო. შეგახსენებთ, რომ ომამდე სატრანზიტო მარშრუტზე ყოველდღიურად 130 ხომალდი გადიოდა.