Marvell Technology-ის კვარტალური შემოსავალი 28%-ით გაიზარდა

ნახევარგამტარების ამერიკულმა კომპანია Marvell-ის ბოლო 3 თვის ფინანსური შედეგები წარადგინა. ტექნოლოგიური ფირმის კვარტალურმა შემოსავალმა $2.42 მილიარდი შეადგინა და ანალიტიკოსების პროგნოზები სრულად გაამართლა. კომპანიის შემოსავლების მოცულობა წლიურად 28%-ით გაიზარდა. თუმცა თუ გასული წლის ანალოგიურ პერიოდში კომპანიამ $177.9 მილიონის წმინდა მოგება მიიღო, ამჯერად მაჩვენებელმა მხოლოდ $34.5 მილიონი შეადგინა. რაც შეეხება ერთ აქციაზე კორექტირებულ მოგებას, ის 80 ცენტით განისაზღვრა და ექსპერტების მოლოდინებს ზუსტად დაემთხვა.

რაც შეეხება წმინდა მოგების მკვეთრ კლებას, როგორც ირკვევა, მიზეზი კომპანიის მიერ განხორციელებული ბოლოდროინდელი შესყიდვები და ერთჯერადი ფინანსური ხარჯები გახდა. რაც შეეხება Marvell-ის საერთო შემოსავლების გაუმჯობესებას, ეს მონაცემთა ცენტრების ბიზნესის გაფართოებასთანაა დაკავშირებული. არსებული მონაცემებით, დასახელებულ სექტორზე კომპანიის მთლიანი შემოსავლის 75%-ზე მეტი მოდის. აღმასრულებელი დირექტორის, მეტ მერფის განცხადებით, ბოლო თვეებში ხელოვნურ ინტელექტთან დაკავშირებული შეკვეთების რაოდენობა მნიშვნელოვნადაა გაზრდილი. აღსანიშნი ფაქტია, რომ მონაცემთა ცენტრების პარალელურად, ფინანსური ზრდა საკომუნიკაციო ბიზნესის მიმართულებითაც დაფიქსირდა.

რაც შეეხება მომავალ პერიოდს, Marvell-მა ფისკალური მეორე კვარტალის საპროგნოზო მაჩვენებლები განსაზღვრა. ტექნოლოგიური კომპანია პროდუქტების რეალიზაციიდან დაახლოებით $2.7 მილიარდის შემოსავალს ელოდება. რაც შეეხება ერთ აქციაზე კორექტირებულ მოგებას, ის 88-დან 98 ცენტამდე განისაზღვრა. საყურადღებოა, რომ ანალიტიკოსები ამ მიმართულებით მხოლოდ 90 ცენტის მიღებას პროგნოზირებდნენ. საბოლოო ჯამში, უახლესი ფინანსური ანგარიშის გამოქვეყნების შემდეგ, Marvell-ის აქციების ფასი 4.59%-ით შემცირდა.

შეგახსენებთ, რომ Marvell Technology-ი ნახევარგამტარების ინდუსტრიაში მომუშავე ამერიკული კომპანიაა. ის მონაცემთა ცენტრებისა და საკომუნიკაციო ქსელებისთვის აუცილებელ ჩიპებს ქმნის.