მესტიაში პოლიციამ კიდევ 42 უკანონო მაინერი ამოიღო - შსს
მესტიის მუნიციპალიტეტში ჩატარებული საგამოძიებო მოქმედებების შედეგად, დამატებით 42 ე.წ. მაინერი ნივთმტკიცებად ამოიღეს. ინფორმაციას ამის შესახებ შსს ავრცელებს.
უწყების ცნობით, გამოძიებით დგინდება, რომ ადგილობრივები ამ მოწყობილობების საშუალებით სისტემატურად ახდენდნენ ციფრული ვალუტის გენერირებას და არალეგალური შემოსავლების მიღებას.
„აღნიშნული მოწყობილობების საშუალებით, ადგილობრივები დიდი რაოდენობით ელექტროენერგიის უკანონო და მართლსაწინააღმდეგო მოხმარებით, სისტემატურად ახდენდნენ ციფრული ვალუტის გენერირებას და არალეგალური შემოსავლების მიღებას“, - ნათქვამია სამინისტროს განცხადებაში.
სამინისტროს ინფორმაციით, სამართალდამცველები ინტენსიურ რეჟიმში აგრძელებენ საგამოძიებო მოქმედებებს, დანაშაულში მონაწილე სხვა პირების გამოვლენისა და მათ მიმართ შესაბამისი სამართლებრივი ღონისძიებების გატარების მიზნით.
საქმეზე გამოძიება საქართველოს სისხლის სამართლის კოდექსის 229-ე პრიმა მუხლის მე-2 ნაწილის „ბ“ ქვეპუნქტით მიმდინარეობს, რაც გულისხმობს ელექტროენერგიის ან ბუნებრივი გაზის დატაცებას/უკანონო მოხმარებას, რამაც მნიშვნელოვანი ზიანი გამოიწვია.
აღნიშნული მუხლი სასჯელის სახით 3 წლამდე ვადით თავისუფლების აღკვეთას ითვალისწინებს.
აღსანიშნავია, რომ სამართალდამცველებმა მესტიიდან ჯამში 254 ე.წ მაინერი ამოიღეს. უკანონო კრიპტოგამომუშავებასთან აქტიური ბრძოლა კი მას შემდეგ დაიწყო, რაც ვიცე-პრემიერმა მამუკა მდინარაძემ განაცხადა, რომ მესტიის გამრიცხველიანება სწორედ აღნიშნული ფაქტით განპირობებული ელექტროენერგიის ჭარბი მოხმარების გამო იგეგმება.
