Micron Technology-ის საბაზრო კაპიტალიზაციამ $1 ტრილიონს მიაღწია

ამერიკულმა ტექნოლოგიურმა გიგანტმა, კომპანია Micron Technology-მ ისტორიაში პირველად შეძლო $1 ტრილიონიანი საბაზრო კაპიტალიზაციის ზღვრის გადალახვა. სამშაბათის სავაჭრო სესიაზე დასახელებული მწარმოებლის აქციების ფასი 17.4%-ით გაიზარდა და ერთი აქციაზე $881.6-ს მიაღწია.

როგორც ირკვევა, ეს მკვეთრი მატება გამოიწვია ფინანსური ორგანიზაცია UBS-ის მიერ გამოქვეყნებულმა ანგარიშმა, რომელმაც კომპანიის აქციების მიზნობრივი ფასი $535-დან $1,625-მდე გაზარდა.

აღსანიშნავია, რომ კაპიტალიზაციის ეს ზრდა ხელოვნური ინტელექტის ინფრასტრუქტურაში მეხსიერების ჩიპებზე გაზრდილი მოთხოვნითაა განპირობებული. ამასთან, მატების ტენდენცია დაკავშირებულია ინვესტორთა იმ სტრატეგიის ცვლილებასთან, რომლის ფარგლებშიც ისინი ფულს უფრო მეტად დეფიციტური პროდუქტების მწარმოებელ ტექ-გიგანტებში აბანდებენ, რადგან მომდევნო წლების განმავლობაში სარგებლის მიღების პროგნოზი მათ შემთხვევაში გაცილებით დადებითია.

B. Riley Wealth-ის მთავარი ბაზრის სტრატეგის განცხადებით, მაშინ, როცა მონაცემთა ცენტრების ფუნქციონირებისთვის მეხსიერების ბარათებზე მოთხოვნა უმოკლეს დროში მკვეთრად გაიზარდა, Micron Technology-მ მოახერხა და ამ პროცესის ეპიცენტრში მოექცა. ანალიტიკოსები მიიჩნევენ, რომ ეს სტრატეგიული სვლა ამერიკულ მწარმოებელს და მის ინვესტორებს სარგებელს კიდევ დიდი ხნის განმავლობაში შეუნარჩუნებს.

ცნობისთვის, მეხსიერების ჩიპების უმსხვილეს მწარმოებლად სამხრეთკორეული Samsung Electronics-ი მიიჩნევა. მან $1 ტრილიონიანი ნიშნული რამდენიმე კვირის წინ გადალახა. კიდევ ერთმა კონკურენტმა, SK Hynix-მა კი ამ მაჩვენებელს რამდენიმე საათის წინ მიაღწია.