"მნიშვნელოვანია ქობულეთის მუნიციპალიტეტის ტურისტული პოტენციალის გაძლიერება" - რა პროექტები მიმდინარეობს?

აჭარის მთავრობის თავმჯდომარის განცხადებით, მნიშვნელოვანია ქობულეთის მუნიციპალიტეტის ტურისტული პოტენციალის გაძლიერება და ისეთი პროექტების განხორციელებაა, რომლებიც ქალაქს ოთხივე სეზონზე კიდევ უფრო მიმზიდველს გახდის.

აჭარის მთავრობის პრესსამსახურის ინფორმაციით, ზურაბ პატარაძე უმაღლესი საბჭოს თავმჯდომარე ცოტნე ანანიძესთან, ქობულეთის მერთან ირაკლი ცეცხლაძესთან და ქობულეთის დელეგატთან საქართველოს პარლამენტში, გია ჭყონიასთან ერთად, მუნიციპალიტეტში მიმდინარე ინფრასტრუქტურულ პროექტებს გაეცნო.

"ქალაქ ქობულეთში, ლესელიძის ქუჩაზე სკვერის რეაბილიტაცია მიმდინარეობს, ხოლო სოფელ გელაურში სკვერის მოწყობასთან ერთად ჩოგბურთის კორტები მოეწყობა.

ზურაბ პატარაძის განცხადებით, აჭარის მთავრობის მიზანია რეგიონში მცხოვრები თითოეული ადამიანისთვის კომფორტული გარემო შეიქმნას. მისივე თქმით, მნიშვნელოვანია ქობულეთის მუნიციპალიტეტის ტურისტული პოტენციალის გაძლიერება და ისეთი პროექტების განხორციელებაა, რომლებიც ქალაქს ოთხივე სეზონზე კიდევ უფრო მიმზიდველს გახდის.

ლესელიძის ქუჩაზე, ბიბლიოთეკის მიმდებარედ მოეწყობა სკვერი საბავშვო ატრაქციონებით, მოსასვენებელი სივრცეებითა და საპარკე ინფრასტრუქტურით. ტერიტორიაზე განთავსდება დეკორატიული სკამები, ფანჩატურები და თანამედროვე გარე განათების სისტემები.

ინფრასტრუქტურული სამუშაოები მიმდინარეობს სოფელ გელაურშიც. პროექტი ითვალისწინებს ჩოგბურთის კორტების მოწყობას შესაბამისი ინფრასტრუქტურით. პარალელურად კეთილმოეწყობა მიმდებარე სკვერი, რომელიც თანამედროვე სტანდარტების მწვანე და რეკრეაციულ სივრცედ ჩამოყალიბდება.

სამუშაოების მიმდინარეობას აჭარის მთავრობის წარმომადგენლები, ასევე ადგილობრივი თვითმმართველობის, მერიისა და საკრებულოს ხელმძღვანელი პირები გაეცნენ",- აღნიშნულია ინფორმაციაში.