მონაცემთა ცენტრები აშშ-სა და ბრიტანეთში ელექტროენერგიის 6%-ს მოიხმარენ - კვლევა

მონაცემთა ცენტრების საერთაშორისო ორგანოს ახალი კვლევის თანახმად, ხელოვნური ინტელექტის განვითარებამ ენერგორესურსებზე მოთხოვნა მკვეთრად გაზარდა.

აშშ-სა და გაერთიანებულ სამეფოში აღნიშნული უკვე ეს ინდუსტრია ეროვნული ელექტრომომარაგების 6%-ს ითვისებს, რაც გლობალურ საშუალო მაჩვენებელს 3-ჯერ აღემატება. ბოლო ორი წლის განმავლობაში, მონაცემთა ცენტრების მიერ მოხმარებული ენერგიის მოცულობა მსოფლიო მასშტაბით 15%-ით გაიზარდა.

როგორც ირკვევა, სექტორში ყოველწლიური გლობალური ინვესტიციები $1 ტრილიონს უახლოვდება, რაც მსოფლიო ეკონომიკის თითქმის 1%-ს შეადგენს. IDCA-ს სპეციალისტების განმარტებით, როდესაც მოხმარება 5%-იან ზღვარს აჭარბებს, ქვეყნებში სოციალური და პოლიტიკური წინააღმდეგობა იწყება. მაგალითად, ბრიტანეთში ელექტროქსელზე მიერთების მსურველთა რიგი 2025 წლის პირველ ნახევარში 460%-ით გაიზარდა, რაც ენერგოდეფიციტის რისკებს ზრდის და საზოგადოებაში პროტესტს იწვევს.

საყურადღებოა, რომ ენერგიის მოხმარების ზრდას "ზომბი სერვისებიც" განაპირობებს — აშშ-ში მოხმარებული ენერგიის 13% იმ აპლიკაციებზე მოდის, რომლებიც ჩართულია, თუმცა რეალურად არ გამოიყენება. ეს დაახლოებით 3 გიგავატზე მეტი სიმძლავრის უსარგებლოდ ფლანგვას ნიშნავს.

შეგახსენებთ, რომ ამჟამად მსოფლიოში 10,000-მდე მონაცემთა ცენტრი ფუნქციონირებს. მათ შორის ერთ-ერთი უმსხვილესია Microsoft-ის ახალი ობიექტი უისკონსინში, რომელიც კომპანიის განცხადებით, მსოფლიოში ყველაზე მძლავრ ტექნოლოგიურ კერას წარმოადგენს.