მონტენეგრო ევროკავშირში გაწევრიანების საბოლოო ეტაპზე გადავიდა

ევროკავშირმა მონტენეგროს გაწევრიანების შესახებ საბოლოო ხელშეკრულებაზე მუშაობა დაიწყო. არსებული ინფორმაციით, ევროკავშირის ელჩებმა სპეციალური სამუშაო ჯგუფი Ad Hoc Working Party დაამტკიცეს.

დასახელებული ჯგუფი წევრი ქვეყნების წარმომადგენლებისგან შედგება და მის ფარგლებში წევრები მონტენეგროს ევროპულ ბლოკში მიღების სამართლებრივ დეტალებს შეათანხმებენ. ბრიუსელში აცხადებენ, რომ ეს ნაბიჯი გაფართოების პარტნიორებისთვის მნიშვნელოვანი სიგნალია.

როგორც ირკვევა, ქვეყანამ გაწევრიანებისთვის საჭირო 33 თავიდან 14 უკვე დახურა. თუმცა კანონის უზენაესობის რეფორმა კვლავ მთავარ გამოწვევად რჩება. ევროკომისარი მარტა კოსი ქვეყანას რეფორმების გაგრძელებისკენ მოუწოდებს.

აქვე უნდა ითქვას ისიც, რომ ევროკომისია მონტენეგროს ე.წ. "უნგრეთი 2.0"-ის პრევენციისთვის სატესტო სუბიექტად განიხილავს. სწორედ ამ რისკების შესამცირებლად შეიქმნა "Ad Hoc Working Party", რომლის მთავარი ამოცანაც დემოკრატიული უკუსვლის თავიდან აცილება იქნება.

შეგახსენებთ, მონტენეგრო ბლოკის წევრობას 2028 წლისთვის გეგმავს. ოფიციალურმა პოდგორიცამ აღნიშნული თარიღი ეროვნული ავიახაზების ბრენდირებაშიც კი ასახა.

ცნობისთვის, მონტენეგრომ ევროკავშირის წევრობის კანდიდატის სტატუსი 2010 წელს მიიღო. ქვეყანამ სერბეთისგან დამოუკიდებლობა 2006 წელს მოიპოვა. გაწევრიანების შესახებ ოფიციალური მოლაპარაკებები კი 2012 წელს დაიწყო.