"მოცვი რჩება დეფიციტურ პროდუქტად" - ასოციაციის პრეზიდენტი

„ლურჯი მოცვის ასოციაციის“ პრეზიდენტის თორნიკე ფარჯავიძის განცხადებით, განსხვავებით სხვა აგრო-კულტურებისგან, ლურჯი მოცვის შემთხვევაში ჭარბწარმოების საფრთხე ამ ეტაპზე არ არსებობს. როგორც ის განმარტავს, მოცვი გლობალურად კვლავ დეფიციტური პროდუქტია და მოთხოვნა ყოველწლიურად 10-15%-ით იზრდება.

„მოცვი რჩება დეფიციტურ პროდუქტად. IBO-ს (მოცვის საერთაშორისო ორგანიზაცია) სტატისტიკით, მსოფლიოში იმდენი ადამიანიც კი არ არის, ვისაც კრეფაში გამოვიყენებთ, რომ სრული მოთხოვნა დავაკმაყოფილოთ. ამიტომ, ჩვენ შეგვიძლია კიდევ უფრო მეტი ვაწარმოოთ. მთავარია სეზონური ფანჯრის გაზრდა სათბურების და საგვიანო ჯიშების ხარჯზე,“ - აცხადებს ფანჯავიძე.

მისივე თქმით, სექტორის მდგრადობისთვის აუცილებელია ინფრასტრუქტურის განვითარება, რათა ფერმერებმა მხოლოდ ნედლეული არ გაყიდონ.

„მდგრადი განვითარებისთვის მნიშვნელოვანია თანამდევი პროცესების - სამაცივრე მეურნეობების და გადამმუშავებელი სიმძლავრეების განვითარება. საქართველოს უნიკალური კლიმატი აქვს - ჩვენ შეგვიძლია ერთ ბაღში როგორც სამხრეთული, ისე ჩრდილოეთური ჯიშები ერთად გვქონდეს, რაც მსოფლიოში ძალიან ცოტა ქვეყანას შეუძლია. ეს გვაძლევს შანსს, ვიყოთ კონკურენტუნარიანები სერბეთთან თუ რუმინეთთან ბრძოლაში,“ - აღნიშნა თორნიკე ფანჯავიძემ.

აღსანიშნავია, რომ წელს საქართველოში, წინა წელთან შედარებით 30-40%-ით მეტი მოსავალი იქნება და ჯამურად მოსავალი 10,000 ტონას მიაღწევს.