მსგავსი პრაქტიკის გამოყენება სხვა პროექტებზეც შეიძლება - შუკაკიძე ქვესადგურის მშენებლობაში ბიზნესის ჩართულობაზე

ენერგეტიკის სექტორის ინვესტორების ნაწილის შეფასებით, ქვესადგურების მშენებლობაში კერძო კომპანიების ჩართვა საინტერესო პრაქტიკა შეიძლება იყოს.

საქმე ისაა, რომ ქვესადგურის პროექტს, რომელიც სახელმწიფო ელექტროსისტემას უნდა განეხორციელებინა, კერძო სექტორიც დააფინანსებს. ვანო ზარდიაშვილმა და ექვსი კერძო ენერგოკომპანიის წარმომადგენელმა ხელი მოაწერეს ურთიერთშეთანხმების მემორანდუმს, რომელიც ქვესადგური „ურბნისის“ ერთობლივ პროექტირებასა და მშენებლობას ითვალისწინებს.

როგორც „ენერჯი დეველოპმენტ ჯორჯიას” და „გრინ ენერჯი ჰოლდინგის“ მმართველმა დირექტორმა “საქმის კურსის” ეთერში განაცხადა, მსგავსი ენერგეტიკული ინფრასტრუქტურის მშენებლობა დაკავშირებულია როგორც ფინანსურ, ასევე საკადრო და ტექნიკურ რესურსთან. შესაბამისად, მისი თქმით, ტემპის დასაჩქარებლად ბიზნესის ჩართულობა გამართლებულია.

გიორგი შუკაკიძე მიიჩნევს, რომ მსგავსი პრაქტიკა შესაძლოა, სახელმწიფო ელექტროსისტემამ სხვა ობიექტებთან მიმართებაშიც დანერგოს, თუმცა მისი თქმით, ამ პროცესში სახელმწიფოს და კერძო სექტორის როლები მკაფიოდ უნდა იყოს გაწერილი.

“საკმაოდ ლოგიკური მოდელია დღეს შექმნილი ამ კონკრეტულ კვანძში. იქიდან გამომდინარე, რომ გენერაციის ობიექტები ითხოვდნენ ქსელზე მიერთების შესაძლებლობას. სახელმწიფოს მხრიდან ამ ინფრასტრუქტურის განვითარება შესაძლებელი იყო გარკვეულ ვადებში, რომელიც შეიძლება მიუღებელი ყოფილიყო დეველოპერებისთვის. მოიძებნა კომპანიების და სახელმწიფოს მიერ ერთობლივად განხორციელების ფორმატი, რომელიც საშუალებას მისცემს უშუალოდ დეველოპერებს, რომ შემდეგ უკვე აშენებული გენერაციის ობიექტები დროულად მიაერთონ გადაცემის ლიცენზიანტის ქსელზე.

ზოგადად, ეს პრაქტიკა შინაარსობრივად შეიძლება საინტერესო იყოს, თითოეული ინფრასტრუქტურის აშენება მოითხოვს როგორც საკადრო რესურსს და ინტელექტუალურს, ასევე ფინანსურ შესაძლებლობებს. თუ შესაძლებელი იქნება, რომ ეს საბოლოო შედეგი უფრო მოკლე დროში დადგეს, ვფიქრობ, კარგია [კერძო სექტორის ჩართულობა]. ოღონდ ეს შემდგომში უნდა იყოს შინაარსობრივად მკაფიოდ გაწერილი პასუხისმგებლობით, თუ ვინ რას აკეთებს, რა ვადაში აკეთებს და მხოლოდ ამ შემთხვევაში იქნება ეს ყველაფერი წარმატებული. სხვა პროექტებზეც ვფიქრობ მსგავსი პრაქტიკა განხილული იქნეს. უკეთესი შედეგი მოკლე დროში რომ იყოს მიღწევადი, შეიძლება ეს ფორმატი სხვა პროექტებზეც გავრცელდეს”, - განაცხადა გიორგი შუკაკიძემ.